Роналду Трампга “махсус хабар” билан формасини совға қилди

Португалиялик футбол юлдузи Криштиану Роналду АҚШ Президенти Дональд Трампга имзоси туширилган футбол формасини совға қилди. Бу ҳақда Оқ уй хабар берди.

Қайд этилишича, футболкани Европа Кенгаши президенти, португалиялик Антониу Кошта кеча, 16 июнь куни G7 саммити ўтаётган Кананаскис шаҳарчасида (Канада) Трампга топширган.

“Президент Дональд Ж. Трампга – Тинчлик учун ўйнаймиз”, деб ёзган Роналду футболкага.

Антониу Кошта ҳам тармоқда футболканинг ҳамда уни Трампга топшираётгани акс этган суратларни эълон қилиб, унда ёзилган хабарни ҳам яқин планда кўрсатган.

“Президент Трампга. Тинчлик учун ўйнаймиз. Жамоа сифатида”, деб изоҳ қолдирган Кошта.

Трампнинг матбуот котиби ёрдамчиси Марго Мартин ушбу совға топширилган лаҳзани видеога олиб, тармоқларда бўлишган. Видеода Антониу Кошта Трампга футболкада “махсус хабар” борлигини айтади. Хабарни ўқиб эшиттиргач, Трамп шундай дейди: “Оҳ, бу менга ёқди. Тинчлик учун ўйнаймиз. Зўр!”

Маълумот учун, 40 ёшли Роналду 2023 йилдан буён “Ал-Наср” шарафини ҳимоя қилмоқда. Жорий мавсумда у 41 ўйинда майдонга тушиб, 35 та гол ва 4 та голли узатмага муаллифлик қилган.