АҚШ 150 дан зиёд мамлакат учун импорт божи жорий қилди. Рўйхатда Ўзбекистон ҳам бор (рўйхат)

АҚШ Президенти Дональд Трамп бутун дунё бўйлаб ўнлаб давлатларга бож ставкаларини жорий қилмоқда, жумладан Ўзбекистон товарларига ҳам. Энг юқори божлар Хитой, Вьетнам ва Камбоджа маҳсулотларига қўлланилди. Бу ҳақда Трампнинг тегишли фармойиши эълон қилинди.

Дональд Трамп АҚШ иқтисодиётда фавқулодда ҳолат эълон қилиб, шу орқали божларни белгилаш бўйича кенг ваколатларга эга бўлган. АҚШ Президентининг фармонида айтилишича, мувозанатсиз тариф ставкалари ва икки томонлама савдо муносабатларидаги ўзаро тенгликнинг йўқлиги, жумладан, АҚШ савдо балансидаги камомад, мамлакат миллий хавфсизлигига ғайриоддий ва фавқулодда таҳдид солмоқда.

Оқ уй раҳбарига кўра, АҚШ бошқа давлатларнинг Америка маҳсулотларга нисбатан қўллаётган умумий бож ставкаларини ҳисоблаб чиқади ва шунга мос равишда унинг ярмига тенг ставкани ўрнатади.

Трамп кўрсатган жадвалга кўра:

• Европа Иттифоқи учун бож ставкаси 20 фоиз,
• Тайвань – 32 фоиз;
• Япония – 24 фоиз;
• Жанубий Африка – 30 фоиз;
• Швейцария – 31 фоиз.

Бирлашган Қироллик, Миср, Туркия, Колумбия, Перу, Аргентина, Чили, Сингапур ва Ўзбекистон каби давлатлар учун минимал 10 фоизлик асосий бож белгиланган.

Шунингдек, АҚШ Президенти бож ставкасини нолга тушириш усулини ҳам таклиф қилмоқда – бунинг учун маҳсулот ва товарларни АҚШда ишлаб чиқариш керак. Унинг сўзларига кўра, ўзаро божлар АҚШ учун “олтин давр”ни бошлаб беради ва “иш ўринлари ҳамда фабрикалар шовқин билан АҚШга қайтади”.

Бундан ташқари, бугун, 3 апрелдан бошлаб АҚШ енгил автомобиллар, енгил юк машиналари ва автоулов эҳтиёт қисмлари импортига ҳам 25 фоиз бож жорий қилади.

Дональд Трамп ҳатто ҳеч ким яшамайдиган Херд ва МакДональд оролларига ҳам 10 фоизлик бож қўйди. Ушбу оролларнинг аҳолиси 0 киши, бироқ у ерда пингвинларнинг улкан популяцияси жойлашган. Дунёдаги энг олис қуруқлик жойлашган ҳудуд Ҳинд океанининг жанубий қисмида бўлиб, Херд ва МакДональд оролларидан иборат. Улар Австралиянинг ташқи ҳудудлари ҳисобланади.

“Трампнинг Хитойга нисбатан жорий этган янги бож ставкалари аввалгиларга қўшилди ва натижада Хитой импортига қўлланиладиган умумий бож 54 фоизга етди”, деб маълум қилди АҚШ Молия вазири.