4 яшар болани органларини сотиш ниятида ўлдирган қариндоши ушланди

Ҳиндистоннинг Чхаттисгарх штатида 4 яшар боланинг жасади маккажўхори даласи яқинидаги сув тўпланган чуқурликдан топилди. Уни ўлдиришда гумонланиб, 27 ёшли қариндоши қўлга олинди. Полиция маълумотига кўра, эркак кўпроқ пул топиш мақсадида боланинг органларини сотишни режалаштирган. Бу ҳақда “Haberler” хабар берди.

Қайд этилишича, ҳодиса Жашпур ҳудудида содир бўлган. 4 яшар Житендра Рам жорий йилнинг 5 ноябрь куни эрталаб бедарак йўқолган. Оила аъзолари болани мустақил қидира бошлаган, бироқ уни топа олмагач, полицияга мурожаат қилган.

Боланинг отаси Рамжит Рамнинг айтишича, у оиласи билан тахминан бир йил аввал ишлаш мақсадида Санна қишлоғига кўчиб келган. Улар яшайдиган кулбага отасининг она томондан қариндоши Басудев ҳам тез-тез келиб турган.

Бола йўқолган куни эрталаб Басудев боланинг отаси ва унинг танишини ичимлик ичишга олиб кетган. Кейинроқ уйга қайтган ота ўғлининг йўқлигини пайқаган. Шу куни бир гувоҳ Житендрани Басудев билан бирга даладги кулба томон кетаётганида кўрганини айтган. Шундан сўнг полиция боланинг қариндошидан шубҳалана бошлаган.

Икки кун давом этган қидирув ишлари жорий йилнинг 7 ноябрь куни якунланган. Житендранинг жасади маккажўхори даласи яқинидаги сув тўпланган чуқурликдан топилган. Бола кўрпа-тўшакларга ўралиб, қопга солинган, жасаднинг усти эса қисман тупроқ билан ёпилган ҳолатда бўлган.

Полиция маълумотига кўра, 27 ёшли Басудев қишлоқ хўжалиги ишчиси бўлиб ишлаган ва топаётган даромадидан норози бўлган. У интернет орқали кўпроқ пул топиш йўлларини излаган ва болаларнинг органларини сотиш фикрига келган.

Тергов маълумотларига кўра, гумонланувчи Житендрани алдаб, оиласидан узоқлаштирган. Кейин уни турли жойларга олиб борган, ичимлик ва товуқ сотиб олган. Полиция Басудев болага спиртли ичимлик бергани, у ухлаб қолганидан кейин эса пичоқ билан ўлдирганини билдирган.

Гумонланувчи сўроқ пайтида боланинг бир буйраги, бир ўпкаси ва бир кўзини олиб ташлаганини тан олган. Уларни пластик идишга солган, жасадни эса кўрпа ва адёлга ўраб, қопга яширган.

Бироқ полиция органларни сотиш ҳақидаги тахмин ҳозирча фақат гумонланувчининг кўрсатмаларига асосланганини маълум қилган. Органларни сотиб олиши мумкин бўлган шахслар билан алоқа ўрнатилгани ёки савдо амалга оширилганини тасдиқловчи далиллар топилмаган.