Шифокорлар адашиб беморнинг соғ қулоғини операция қилди

Туркияда шифокорлар беморнинг касалланган қулоғи ўрнига соғлом қулоғини операция қилди. Бу ҳақда “Akşam” хабар берди.

Нашрнинг ёзишича, Кожаэли шаҳрида яшовчи Мурат Таракчи ўнг қулоғида суюқлик тўплангани сабабли Истанбулнинг Тузла туманидаги Окан университети шифохонасига мурожаат қилган. Бироқ операция вақтида адашиб, унинг чап қулоғига найча ўрнатилган. Наркоз таъсиридан ўзига келган Таракчи чап қулоғида кучли оғриқни ҳис қилган ва шифокорлар хатосини пайқаган.

Шундан сўнг, тиббий гуруҳ ўша куннинг ўзида беморни яна умумий наркоз остида операция қилиб, ўнг қулоғида ҳам жарроҳлик амалиётини ўтказган.

“Профессорнинг ўнг ва чап қулоқни адаштириши жиддий хато”, дея норозилик билдирган Таракчи.

У шифохона ва шифокор устидан шикоят қилган. Шифохона маъмурияти эса ҳуқуқий жараён давом этаётгани сабабли ҳозирча изоҳ бермаслигини билдирган.