Миллиардер Билл Гейтс Эпштейн иши бўйича кўрсатма берди

Билл Гейтс Конгрессдаги кўрсатмасида Жеффри Эпштейн уни никоҳдан ташқари муносабатлари ҳақидаги маълумотлар орқали босим остига олганини билдирди. Бу ҳақда “Reuters” хабар берди.

Microsoft корпорацияси асосчиларидан бири Билл Гейтс кеча, 10 июнь куни АҚШ Конгресси аъзоларига берган кўрсатмасида жинсий жиноятларда айбланган Жеффри Эпштейн билан ҳамкорлик қилган пайтда унинг жиноятлари кўламини тўлиқ тушунмаганини айтган.

Гейтс, шунингдек, Эпштейн томонидан содир этилган бирор жиноий ҳаракатга шахсан гувоҳ бўлмаганини маълум қилган. Унинг айтишича, Эпштейн никоҳдан ташқари муносабатлари ҳақидаги маълумотлардан фойдаланиб, унга босим ўтказган.

Бу муносабатларнинг Эпштейн билан бўлган алоқаларимга ҳеч қандай боғлиқлиги йўқ эди, аммо улар оилам учун оғир кечди. Эпштейн менинг хиёнатларим ҳақидаги маълумотлардан, шунингдек, уларга қўшимча қилиб тарқатган кўплаб ёлғонлардан фойдаланиб, мени у билан яна ҳамкорлик қилишга мажбурлашга уринган”, деган Гейтс ўз баёнотида.

Конгресс ҳозирда АҚШ Адлия вазирлигининг Эпштейн ишини қандай юритганини текширмоқда. Миллиардернинг кўрсатмалари аёллар ва қизларни оғир ижтимоий шароитлардан ўз домига тортиб келган Эпштейн билан бўлган алоқаларига бағишланган.

Қайд этилишича, Билл Гейтс Ваколатлар ва давлат ислоҳотлари бўйича Қуйи палата қўмитасига ёпиқ эшиклар ортида кўрсатма берган. Қўмита Эпштейн ва унинг шериги Гислейн Максвеллга қарши ишлар ҳамда улар билан боғлиқ масалаларда федерал даражадаги эҳтимолий бошқарув хатоларини текширмоқда.

Қўмита раиси, республикачи конгрессмен Жеймс Комер март ойида Гейтсга шахсан келиб кўрсатма беришни талаб қилгани ҳақида мактуб юборган. “The New York Times” газетасининг ёзишича, Гейтс қўмитанинг собиқ бош терговчиси Жейк Гринбергни ўз чиқишига тайёргарлик кўриши учун ёллаган.

Маълумот ўрнида, Жеффри Эпштейн 2008 йилда Флорида штатидаги фоҳишалик билан боғлиқ жиноят иши бўйича айбини тан олган ва 13 ой қамоқ жазосини ўтаган. 2019 йилда федерал прокурорлар уни вояга етмаганларни жинсий эксплуатация қилишда айблаган. Эпштейн бу айбловларни рад этган, аммо ўша йилнинг ўзида суд бошланишидан олдин қамоқхонада ўз жонига қасд қилгани расман маълум қилинган.

Жорий йилда АҚШ Адлия вазирлиги томонидан эълон қилинган ҳужжатларга кўра, Гейтс ва Эпштейн 2008 йилдаги қамоқ жазосидан кейин бир неча бор учрашиб, миллиардернинг хайрия фаолиятини кенгайтириш масалаларини муҳокама қилган. Ҳужжатлар орасида Гейтснинг юзлари яширилган аёллар билан тушган суратлари ҳам бор. Гейтс аввал ҳам Эпштейн билан муносабатлари фақат хайрия ишлари билан чекланганини айтган ва у билан учрашгани хато бўлганини тан олган.

Гейтс жамғармаси вакили “Reuters” агентлигига февраль ойида ўтказилган йиғилишда миллиардер “ўз ҳаракатлари учун масъулиятни зиммасига олганини” билдирган.

Гейтснинг Эпштейн билан муносабатлари Гейтс жамғармасини ҳам текширувлар марказига олиб келди. Жамғарма апрель ойида педофил молиячининг ташкилот билан алоқаларини ташқи аудит орқали текширишни бошлаганини маълум қилган. Адлия вазирлиги январь ойида эълон қилган электрон хатларда Эпштейн ва Гейтс жамғармаси ходимлари ўртасидаги мулоқотлар ҳам мавжуд бўлган.

Қуйи палата қўмитасининг тергови ҳуқуқни муҳофаза қилувчи органларнинг текширув ва суд ишларини қандай олиб боргани, келишувлар, Эпштейннинг ўлими, одам савдосига қарши курашдаги камчиликлар, этика билан боғлиқ муаммолар ва ҳукумат ҳужжатларини ошкор қилишдаги кечикишларни қамраб олган.

Адлия вазирлиги томонидан миллионлаб ички ҳужжатларнинг эълон қилиниши Эпштейннинг сиёсат, молия, илм-фан ва бизнес соҳаларидаги кўплаб машҳур шахслар билан алоқаларини очиб берган. Улар орасида 1990 ва 2000 йилларда Эпштейн билан яқин мулоқотда бўлган АҚШ Президенти Дональд Трамп ҳам бор.

Апрель ойида Дональд Трамп томонидан лавозимидан озод қилинган собиқ бош прокурор Пэм Бонди мазкур ишни юритиш тарзи учун қаттиқ танқидларга учраган. Айрим танқидчилар уни Трампни жамоатчилик назоратидан ҳимоя қилишга уринганликда айблаган. Трамп узоқ вақт давомида мазкур ҳужжатларни эълон қилишга қарши чиққан, аммо кейинчалик Конгресс уларни ошкор қилишни талаб қилувчи қонунни кўпчилик овоз билан қабул қилишидан сал олдин бу қарорга розилик билдирганди.