Эрон Ҳормуз бўғозини очиш учун шартларини айтди

Эрон маълум шартлар бажарилган тақдирда Ҳормуз бўғози орқали кемалар ҳаракатини тиклашга тайёр. Бу ҳақда “Tasnim” ахборот агентлиги хабар берди.

Хабарда айтилишича, бўғоз фаолиятини қайта тиклаш қуйидаги шартларга боғлиқ:

• санкцияларнинг кафолатли бекор қилиниши;
• Америка Қўшма Штатлари ҳарбий базаларининг ёпилиши;
• музлатилган Эрон активларининг блокдан чиқарилиши;
• доллардан ташқари валюталарда савдони ривожлантириш.

Теҳрон аввалроқ Америка Қўшма Штатлари ва Исроилнинг Эронга қарши ҳарбий амалиётида қатнашмаётган айрим давлатлар кемаларига Ҳормуз бўғози орқали ўтишга рухсат берилганини маълум қилган.

Эрон Ташқи ишлар вазирлиги вакили Исмоил Бағоий бўғоз тўлиқ ёпилмаганини, аммо у орқали кемалар ҳаракати фақат маълум шартлар асосида амалга оширилаётганини таъкидлаган. У бу шартларнинг аниқ тафсилотларини ошкор қилмаган.

Бундан аввал юқори лавозимли эронлик амалдор CNN телеканалига берган интервьюсида Теҳрон нефть танкерларини чекланган тарзда ўтказиш имкониятини кўриб чиқаётгани, бунда юклар Хитой юани орқали савдо қилиниши мумкинлигини айтган.

Эроннинг Ислом инқилоби қўриқчилари корпуси эса айрим давлатлар кемаларининг бўғоздан ўтиши учун Америка Қўшма Штатлари ва Исроил элчиларини чиқариб юбориш шарти қўйилганини билдирган.

Маълумот учун, Ҳормуз бўғози орқали дунё нефтининг қарийб 20 фоизи ва суюлтирилган табиий газнинг 30 фоизигача қисми ўтади. Шу сабабли у дунёдаги энг муҳим энергетик йўллардан бири ҳисобланади.

Америка Қўшма Штатлари ва Исроил Эронга қарши ҳарбий амалиётни бошлаганидан сўнг, Эрон амалда Ҳормуз бўғози орқали кемалар ҳаракатини чеклаб қўйди. Оқибатда, Форс кўрфази давлатларидан чиқадиган ёқилғи ташувчи танкерлар ҳаракатининг қийинлашуви сабаб, дунёда энергия нархлари кескин ошди.