Трампнинг бош маслаҳатчиси Ўзбекистонда туғилгани маълум бўлди

АҚШ Президенти Дональд Трампнинг Сержио Гор исмли энг ишонган ходимларидан бири Тошкент шаҳрида туғилган. Бу ҳақда Уюшган жиноятчилик ва коррупция ҳақида ахборот бериш лойиҳаси (Organized Crime and Corruption Reporting Project) хабар берди.

Лойиҳанинг ёзишича, шу пайтгача Америка оммавий ахборот воситаларида “энг кучли одам” сифатида таърифланган, Оқ уйда Трамп маъмуриятида минглаб амалдорларни тайинлашни назорат қилган ушбу шахс 1986 йил 30 ноябрда Тошкент шаҳрида туғилган. Унинг ҳақиқий исми – Сержио Гороховский.

Горнинг адвокати Роберт Гарсон ҳам унинг Тошкентда туғилганини тасдиқлаган. Горнинг ўзи аввалроқ қаерда туғилганини айтишдан бош тортган эди. 2024 йил декабрда “The Washington Post” газетасида Сержио Гор ҳақида мақола чоп этилганди. Унда Гор Трамп маъмуриятида “кучли одам”га айланганига қарамай, унинг паст даражадаги ижтимоий обрўси таъкидланганди – унинг туғилган жойи ҳақидаги савол бутунлай четлаб ўтилганди. Газета уни Мальтадан чиққан муҳожир сифатида тасвирлаганди.

Жорий йилнинг июнь ойида у ҳақида “New York Post” газетаси ҳам ёзганди. Гор эса доимгидек газетага ўзининг туғилган мамлакатини ошкор қилишдан бош тортганди ва фақат у Россияда эмаслигини айтганди.

Айрим манбаларга кўра, Гор болалигининг камида 5 йилини Мальтада ўтказган. Унинг онаси 1994 йилда Мальтада компанияга асос солиб, ўзини Исроил фуқароси деб қайд этган. Компания орқали у мустаҳкам портга эга қадимий қирғоқ шаҳри – Коспикуада уй сотиб олган.

2021 йилда Гор бу уйни онасининг компаниясидан 255 минг еврога (268 минг АҚШ доллари) сотиб олган, нотариал тасдиқланган мулк ҳужжатида унинг Ўзбекистон пойтахтида туғилгани ёзилган. Адвокат Гарсоннинг сўзларига кўра, бу уй Гор оиласининг хотираларга бой уйи бўлган ва уни у хотиралар туфайли сақлаб қолишни истаган.

Коспикуа яқинидаги Витториоза шаҳридаги ўғил болалар учун католик мактаби бўлган De La Salle коллежи Сержио Гороховский 1996-1999 йиллар оралиғида Мальтада таҳсил олганини тасдиқлаган.

Горнинг оиласи кейинчалик АҚШга кўчиб ўтган ва у Америка фуқаролгини олган. Сиёсий карьерасини Республикачилар партиясида бошлаган ва сенатор Рэнд Пол билан ишлаган. 2018 йилда Пол билан бирга Москвага сафар қилган, сафар Cato Institute томонидан молиялаштирилган. Сафар “АҚШ-Россия муносабатларини ўрганиш” мақсадида ташкил этилгани айтилган.

У 2017 йилда ҳам Москвада бўлган – Россия чегара ҳужжатларига кўра, у Вашингтондан “Аэрофлот” орқали учиб келган ва эртасига Римга учиб кетган. Адвокати бу сафарларни “оддий транзит” дея изоҳлаган ва бошқа тахминларни рад этган.

2020 йилда Сержио Гор Рэнд Полнинг идорасини тарк этиб, Трампнинг қайта сайланиш кампаниясида молиявий штаб бошлиғи бўлиб ишлаган.

Кейинчалик Трампнинг ўғли Дональд Трамп Жуниор билан бирга Winning Team Publishing деб номланган консерватив нашриётга асос солган.