Тошкентда “Озарбайжон”, Бакуда эса “Ўзбекистон” боғи қурилади

Озарбайжон пойтахти Баку шаҳрида “Ўзбекистон” боғи, Тошкентда эса “Озарбайжон” боғи барпо этилади. Бу ҳақда IV Тошкент халқаро инвестиция форуми доирасида ташкил этилган “Озарбайжон – Ўзбекистон: иқтисодий ҳамкорлик вектори” мавзусидаги панел сессиясида Озарбайжон Экспорт ва инвестицияларни рағбатлантириш агентлиги (AZPROMO) ижрочи директори Юсуф Абдуллаев маълум қилди.

Унинг таъкидлашича, ушбу боғлар икки халқ ўртасидаги дўстлик ва ўзаро ҳурмат рамзига айланиши кутилмоқда.

“Июнь ойи бошида Тошкент шаҳри ҳокими ва менинг яқин дўстим Шавкат Умурзоқов ишчи ташриф билан Баку шаҳрига келди. Ташриф доирасида Оқ шаҳар ҳудудида жойлашган, бўлажак “Ўзбекистон” боғи қуриладиган майдон кўздан кечирилди”, деди у.

Шунингдек, Абдуллаев Озарбайжон делегациясининг Тошкентга жавоб ташрифи жорий ой охирига белгиланганини маълум қилди. Унга кўра, ташриф доирасида “Озарбайжон” боғи барпо этиладиган ҳудуд ҳам кўздан кечирилади. Бироқ QALAMPIR.UZ ҳокимлик билан боғланганда боғ учун ҳозирча ер ажратилмагани, қарор йўқлиги айтилди.

“Бу икки пойтахт ўртасида маданий кўприкка айланиши мумкин”, деган Абдуллаев.