Футболчиларимдан ғурурланаман. Улар яхши ўйнади – Каннаваро

Ўзбекистон миллий терма жамоаси бош мураббийи Фабио Каннаваро Колумбияга қарши учрашувдан кейин матбуот анжуманида ўйин ҳақида ўз фикрларини билдирди.

Мураббийнинг таъкидлашича, жамоа иккинчи бўлимда ўйинни ўзгартира олган ва ташаббусни қўлга олишга ҳаракат қилган.

"Ўйин қизиқарли ўтди. Иккинчи бўлимда биз ўйинни ўзгартиришга эришдик. Чап қанотдан имкониятлар яратдик. Ўйин назоратини ўз қўлимизга олишга ҳаракат қилдик", деди Каннаваро.

Бош мураббий Ўзбекистон терма жамоасининг Жаҳон чемпионатида иштирок этаётгани мамлакат футболи учун муҳим воқеа эканини таъкидлади.

"Авваламбор, биз Ўзбекистонни бутун дунёга ижобий намойиш этиш учун бу ерга келдик. Колумбия сингари жамоаларга қарши ўйнаш, тўпсиз ҳаракат қилиш осон эмас. Умуман олганда, иккинчи бўлимда яхши ҳаракат қилдик, бироқ афсуски гол ўтказиб юбордик", деди у.

Каннаваро мазкур баҳсни тарихий ўйин сифатида баҳолар экан, жамоа келгусида хатолар устида ишлашини қайд этди.

"Биз бу стадиондаги ушбу ўйинни эслаб қоламиз. Чунки бу тарихий ўйин. Биз Жаҳон чемпионатидамиз. Бугунги ўйин биз учун яхши бўлди, деб айта оламан. Хатолар бўлди, улар устида ишлаймиз. Футболчиларимдан ғурурланаман. Улар яхши ўйнашди. Бугун қийин ўйин бўлди. Бундай стадионда, мухлислар қаршисида ўйнаш осон эмас. Лекин бу сизга кўпроқ мотивация бериши ҳам мумкин", деди Фабио Каннаваро.