Биз бу ерга ўзбекларнинг менталитетини кўрсатиш учун келганмиз – Каннаваро

Ўзбекистон миллий терма жамоаси бош мураббийи Фабио Каннаваро Колумбияга қарши ўйин олдидан рақиб ўйини батафсил таҳлил қилинганини айтди. Бу ҳақда Каннаваро ўйин ўтказилган матбуот анжуманида сўз очди.

“Бу биз учун илк Жаҳон чемпионати. Эртага бутун мамлакат бизга мухлислик қилади. Барча футболчилар учрашувга тайёр”, дейди Каннаваро.

Мураббий терма жамоа ҳимоячиси Абдуқодир Ҳусанов ҳақида ҳам тўхталиб ўтди.

“Ҳусанов албатта муҳим ҳимоячиларимиздан бири. Унинг янада юқори даражага чиқиш имконияти бор. Айни пайтда ҳам у юқори савияда ўйин кўрсатмоқда”, дейди италиялик мутахассис.

Каннаваронинг таъкидлашича, Ўзбекистон терма жамоаси мундиалда нафақат натижа, балки ўзбек халқининг характерини ҳам намойиш этишни мақсад қилган.

“Биз бу ерга энг яхши фазилатларимизни, ўзбекларнинг менталитетини кўрсатиш учун келганмиз. Мен жамоа билан ишлаш жараёнида ўз тажрибамни улашишга ҳаракат қилдим. Чунки мен ҳам ўз вақтида Жаҳон чемпионатида дебют қилганман ва футболчиларга шу тажрибаларни етказишга интилдим”, деди у.

Фабио Каннаваро Колумбия ва Португалияни гуруҳдаги энг кучли рақиблар сифатида баҳолади.

“Колумбия ва Португалия юқори даражадаги футбол намойиш этади. Уларнинг таркибида кучли ижрочилар жамланган. Шунинг учун уларга қарши эҳтиёткорлик билан ҳаракат қиламиз. Колумбияда фақат Хамес Родригес эмас, бошқа кўплаб юқори савиядаги футболчилар ҳам бор. Колумбияни яхши ўргандик. Улар ҳар бир вазият учун охиригача курашади. Биз ҳам ўз имкониятларимизни намойиш этиш учун майдонга тушамиз”, дейди Ўзбекистон терма жамоаси бош мураббийи.

Маълумот учун, Ўзбекистон миллий терма жамоаси эртага, 18 июнь куни Колумбия терма жамоасига қарши Жаҳон чемпионатидаги дастлабки учрашувини ўтказади. Ушбу баҳс Тошкент вақти билан тонги соат 07:00 да бошланади. Шундан сўнг, терма жамоа Хьюстонда 23 июнь куни Португалия билан, 27 июнь куни эса Аталантада Конго Демократик Республикаси билан баҳс олиб боради.