Мальдивга асал ойига борган сайёҳнинг оёғини акула узиб олди

Мальдив оролида саёҳатга келган испаниялик Борҳа исмли сайёҳга акула ҳужум қилди. Бу ҳақда “Daily Mail” хабар берди. 

Маълум қилинишича, 31 ёшли сайёҳ сувда турган вақтида унга акула ҳужум қилган. Оқибатда жабрланувчи оёғининг тиззасидан пастки қисмини узиб олган. Борҳа зудлик билан шифохонага олиб борилган. Унинг шикастланган оёғи кесиб ташланган ва қон қуйилган. Сайёҳнинг аҳволи оғирлиги айтилмоқда. 

Ҳабарга кўра, у тўйдан сўнг асал ойини ўтказиш учун рафиқаси Анна билан Малдивга келган. Улар сайёҳлар гуруҳи билан сув экскурсиясига чиққан. Экскурсия доирасида сайёҳларга океанда чўмилиш таклиф қилинган. Ушбу таклифдан сўнг эркак чўмилиш истагида сувда турган вақтида аянчли воқеа содир бўлган. 

Эркакнинг рафиқаси сайёҳлик компаниясини судга берган. Аёлнинг фикрича, турмуш ўртоғи компания эътиборсизлиги қурбонига айланган.

Маълумот учун, экскурсия балиқни қайта ишлаш заводи яқинида ўтказилган ва у ерда кўплаб акулалар сузиб юрган. Тахминларга кўра, завод анчадан бери балиқ чиқиндиларини сувга ташламаган ва шу боис оч акулалар Борҳага ҳужум қилган.