Францияда мактаб ўқувчилари бош кўтарди: 440 киши қўлга олинди (фото)

Францияда ўқувчиларнинг таълим тизимидаги муаммоларга қарши норозиликлари вақтида 440 киши ушланди. Бу ҳақда “The Guardian” хабар берди.

Қайд этилишича, 29 сентябрь куни мамлакат бўйлаб 3 700 га яқин мактабдан 400 тасида намойишлар ёки тартибсизликлар кузатилган. Ўқувчилар синфлардаги ўқувчилар сонининг кўплиги, ўқитувчилар етишмаслиги ва дарс жадвалларининг ҳаддан ташқари тиғизлигига қарши чиққан.

Норозиликлар дастлаб Парижда бошланган ва кейинчалик мамлакатнинг бошқа ҳудудларига тарқалган. Лилл шаҳрида юқори синф ўқувчилари чиқинди қутиларига ўт қўйган, полициячиларга шиша идишлар, тошлар ва бошқа буюмларни отган. Ҳуқуқ-тартибот ходимлари намойишчиларни тарқатиш учун кўздан ёш оқизувчи газ ишлатган.

Франция Ички ишлар вазири Лорон Нюнецнинг маълум қилишича, мамлакат бўйлаб 440 киши қўлга олинган. Уларнинг қарийб учдан икки қисми полиция бўлимларига олиб кетилган. Тўқнашувлар вақтида жами 48 нафар полициячи жароҳатланган. Расмийларга кўра, айрим намойишчилар ҳуқуқ-тартибот ходимларига хлорид кислота ҳам улоқтирган.

Париж шимолидаги Ламартин лицейида ўқувчилар тиғиз дарс жадвалига қарши плакатлар кўтарган. Улардан бирида “08:00–18:00. Дарс соатлари уйқудан кўп” деган ёзув бўлган.

Париж яқинидаги Сена-Сен-Дени ҳудудида эса юзлаб ўқувчилар иштирокидаги намойишга мэр Балли Багайоко ҳам қўшилган. У норозиликларни қонуний деб атаб, кам даромадли ҳудудларга бошқа жойларга қараганда камроқ ресурс ажратилаётганини билдирган. Франция Бош вазири Себастьян Лекорню намойишларнинг кучайиши масъулиятсизлик бўлишини айтган. У мактаблар яқинидаги ёнғинлар ва зўравонликларни қоралаган.

Шу билан бирга, “Бўйсунмас Франция” партияси етакчиси Жан-Люк Меланшон полициянинг намойишчиларга қарши ҳаракатларини танқид қилган. Лекорню эса унинг баёнотларини “масъулиятсиз кескинлаштириш” деб баҳолаган.