Футболчилардан айб қидириш халқимизга хос иш эмас – Шавкат Мирзиёев

Президент Шавкат Мирзиёев Ўзбекистон миллий терма жамоасининг 2026 йилги Жаҳон чемпионатидаги иштирокига муносабат билдириб, футболчиларни танқид қилиш эмас, аксинча, уларни қўллаб-қувватлаш муҳимлигини айтди. Бу ҳақда Шавкат Мирзиёев бугун, 30 июнь куни ёшлар билан учрашув чоғида сўз очди.

“Миллий жамоамизнинг АҚШ ва Мексика майдонларидаги ўйинларини бутун халқимиз билан бир тан-у, бир жон бўлиб, катта ҳис-ҳаяжон билан кузатиб бордик. Футболчиларимиз FIFA рейтингида 5-ўринда турган Португалия, 13-ўриндаги Колумбия ҳамда кўплаб футболчилари Европанинг етакчи клубларида тўп сурадиган Конго терма жамоалари билан ўтказилган ўйинлар орқали ўзига тажриба орттирди, мундиаль нафасини ҳис қилди десак, тўғри бўлади. Аббос Файзуллаев ва Элдор Шомуродов жаҳон чемпионатидаги илк голларини киритиб, халқимизга хурсандчилик бағишлади”, дейди Шавкат Мирзиёев.

Шунингдек, давлат раҳбари терма жамоанинг мундиалдаги иштироки юзасидан турли фикрлар билдирилаётганини қайд этар экан, мамлакат шарафини ҳимоя қилган футболчиларга нисбатан ортиқча танқидлар ўринсизлигини билдирган.

“Лекин ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим”, дейди Президент.

Бундан ташқари, Шавкат Мирзиёев катта ғалабалар ҳали олдинда экани, бунинг учун футболни ривожлантиришга янада кенг шароитлар яратилиши, бу соҳага инвестиция кўпайтирилиши таъкидлаган. Энг аввало, болалар футболига эътибор кучайтирилиб, мазкур спорт умуммиллий ҳаракатга айлантирилиши ва келаси йилнинг январида Саудия Арабистони майдонларида ўтказиладиган футбол бўйича Осиё кубогига тайёргарлик ҳозирдан бошланиши айтиб ўтилган.

“Биз жамоамизга ишонамиз ва ушбу мусобақада ҳам бутун халқимиз билан қўллаб-қувватлаймиз!” дейди Президент.