“Трамп чекинмоқда”. Эрон АҚШ билан музокара ўтказилганини рад этди

Эрон Президенти Масъуд Пезешкиён АҚШ билан музокаралар бўлаётгани ҳақидаги Президент Дональд Трампнинг баёнотларини рад этди. Бу ҳақда у ўзининг Telegram-каналида ёзиб қолдирди.

Унинг айтишича, Эрон ва АҚШ ўртасида ҳеч қандай музокаралар олиб борилмаяпти. Пезешкиён Трампнинг сўзларини энергия нархларини пасайтиришга уриниш ва ҳарбий режаларни амалга ошириш учун вақт ютиш мақсадидаги баёнот деб баҳолаган.

Қолаверса, Пезешкиён Эрон сўнгги кунларда фақат минтақа давлатлари билан, хусусан Уммон билан музокаралар олиб бораётганини таъкидлаган. Бу мулоқотлар Ҳормуз бўғози орқали кемалар ҳаракатини мувофиқлаштиришга қаратилган бўлиб, очиқ тарзда олиб борилмоқда.

“Теҳрон ва Вашингтон ўртасида ҳеч қандай яширин музокаралар йўқ”, деган Эрон Президенти.

Шунингдек, Ислом инқилоби қўриқчилари корпуси ҳам музокаралар бўлмаганини ва бўлмаслигини билдирган. Уларнинг фикрича, АҚШнинг бундай баёнотлари психологик урушнинг бир қисми бўлиб, бу шароитда Ҳормуз бўғози олдинги ҳолатига қайтмайди ва энергия бозорларида барқарорлик юзага келмайди. Корпус Трампнинг баёнотини “чекиниш” деб баҳолаб, бунга Эроннинг жавоб зарбалари ҳақидаги таҳдидлари сабаб бўлаётганини айтган.

Қайд этиш жоиз, аввалроқ Трамп икки кунлик жуда яхши ва самарали музокаралар бўлиб ўтганини айтиб, Эрон энергетика объектларига зарбаларни 5 кунга тўхтатишни буюрганини билдирган эди. Унинг сўзларига кўра, томонлар Яқин Шарқдаги ҳарбий ҳаракатларни тартибга солиш масаласини муҳокама қилган.

22 март куни Трамп Эрон 48 соат ичида Ҳормуз бўғозини очмаса, мамлакатдаги электр станцияларини йўқ қилиш билан таҳдид қилган эди. Теҳрон эса бунга жавобан АҚШнинг Яқин Шарқдаги барча энергетика ва ахборот инфратузилма объектларига зарба беришини билдирган.