Исроилнинг Эронга ҳужумлари тўхтамайди – Трамп

АҚШ Президенти Дональд Трамп Исроилнинг Эронга ҳужумлари тўхтамаслигини айтди. Бу ҳақда у Канададаги G7 саммитидан қайтаётган Air Force One Оне бортида журналистлар билан суҳбатда сўз очди.

Трамп Эрон ядровий дастурига “ҳақиқий ечим” излаётганини ва Яқин Шарқдаги вазиятни Оқ уйдаги фавқулодда вазиятлар хонасидан кузатиб боришини қайд этди.

Президентнинг сўзларига кўра, у Канадани тарк этаётганда Эрон билан сулҳ тузишга интилаётганини айтмаган, бироқ Теҳрон ядровий қурол яратиш режаларидан бутунлай воз кечишини истаётганини таъкидлаб, бу масалани “ҳақиқий” ҳал қилишга чақирган.

“Кейинги икки кун ичида билиб оласиз. Ҳозирча ҳеч ким тезликни пасайтиргани йўқ”, деб айтган Трамп. 

У одамлар хавфсизлиги, жумладан Теҳроннинг эвакуация қилинишидан хавотирда эканини қўшимча қилди. Шимолий Корея ёки Россиядан Эронга ёрдам белгилари борми, деган саволга эса у шундай жавоб берди:

“Мен бундай нарсани кўрмаганман”.

Трамп Эрон ядровий қурол яратишга “жуда яқин” эканини таъкидлаб, ёпиқ ҳаво ҳудуди шароитида америкаликларни минтақадан эвакуация қилиш чоралари кўрилаётганини айтди.

“Биз қўлимиздан келган барча ишни қиляпмиз”, деди у.

Президент Молия вазири Скотт Бессент ва бошқа бир қанча вакиллар Қўшма Штатлар номидан G7 етакчилари билан учрашувда қолганини қўшимча қилди.

У, шунингдек, саммит декларациясининг якуний матнини кўрмаганини, лекин “уларга маълум позицияларни айтишга рухсат берганини” таъкидлади.

Эрон билан музокаралар олиб бориш учун АҚШнинг Яқин Шарқ бўйича махсус вакили Стив Уиткофф ёки вице-президент Жеймс Дэвид Вэнсни юбориш имконияти ҳақидаги саволга Трамп бу имкониятни инкор этмади:

“Бу мен қайтиб келганимда нима бўлишига боғлиқ”.

Президент, шунингдек, Эрон “Америка ҳарбийларига тегмаслик кераклигини билади”, чунки АҚШ ўз фуқароларига ҳужум қилинган тақдирда “қаттиқ жавоб” беришини айтди.

Америка аралашуви Эроннинг ядровий дастурини йўқ қиладими, деган саволга Трамп ундан анча олдин йўқ қилинишига умид қилишини айтди.