“Ал-Наср” Роналду билан хайрлашишга тайёргарлик кўрмоқда – ОАВ

Саудия Арабистонининг “Ал-Наср” футбол клуби жамоанинг португалиялик ҳужумчиси, мегаюлдуз Криштиану Роналду билан хайрлашиш ниятида. Бу ҳақда “Marca” нашри хабар берди.

Нашрга кўра, бугун, 29 май куни клуб матбуот анжумани ўтказади ва унда таркиб ҳамда маъмурият даражасидаги кўплаб ўзгаришлар эълон қилинади.

Маълумот учун, “Ал-Наср” Саудия Арабистони чемпионатининг якуний жадвалида 70 очко билан учинчи ўринни эгаллади. Чемпион бўлган “Ал-Иттиҳод” билан фарқ 13 очкони ташкил этди. Криштиану Роналду эса 25 та гол билан мусобақанинг энг яхши тўпурарига айланди.

40 ёшли португалиялик футболчи 2023 йилдан бери саудиялик клуб шарафини ҳимоя қилиб келмоқда. Унинг шартномаси шу ёзда якунига етади.