Европа Россияга қарши тўлиқ савдо эмбаргоси жорий этиши мумкин

Европа етакчилари 16 май куни Альбанияда бўлиб ўтадиган учрашувда Россияга қарши санкцияларни кучайтиришни муҳокама қилмоқчи. Бу ҳақда Politico хабар берди.

Мазкур қарорга Россия президенти Владимир Путин 15 май куни тинчлик музокараларида иштирок этиш учун Истанбулга келмагани сабаб бўлмоқда. 16 май куни Тирана шаҳрида Буюк Британия бош вазири Кир Стармер, Франция президенти Эммануэл Макрон, Германия канцлери Фридрих Мерц, Туркия президенти Ражаб Тоййиб Эрдўғон ва Украина президенти Владимир Зеленский учрашиши кутилмоқда.

" Тиранадаги Европа сиёсий ҳамжамияти саммитидаги норасмий учрашувда асосий эътибор Москвага қарши санкцияларни кескин кучайтириш масаласига қаратилади ", дейилади хабарда.

Унда Европа Иттифоқи 2022-йилда жорий этган, бироқ ҳозиргача тўлиқ савдо эмбаргосидан тийилиб келган Россияга нисбатан чора кўриб чиқилади. Европа Иттифоқи вакиллари Россияга қарши 17-пакет санкцияларини тасдиқлаган. Унда нефт ва газ экспортига қарши қўйилган чекловлардан қочиш учун ишлатиладиган “соя флоти”га тегишли деярли 200 та кемага қарши чора-тадбирлар мавжуд.

Европа Иттифоқи, шунингдек, санкцияларни учинчи давлатлар орқали четлаб ўтувчи тахминан 30 та ташкилот билан ўз компанияларига ҳамкорлик қилишни тақиқлайди. Бундан ташқари, Россия ҳарбий машинасига ёрдам берган 75 та жисмоний ва юридик шахс санкциялар рўйхатига киритилган. Чекловлар 20-май куни Европа Иттифоқининг мудофаа ва ташқи ишлар вазирлари томонидан тасдиқланиши кутилмоқда.

Путин 11-май куни Украинага 15-май куни Истанбулда “ҳеч қандай дастлабки шартларсиз” тўғридан-тўғри музокараларни қайта бошлашни таклиф қилган эди. Бунга жавобан Украина президенти Владимир Зеленский ўша куни Туркияда Россия президенти билан музокаралар ўтказишга рози бўлди ва уни 15-май куни Туркияда шахсан кутишини айтди.

Россия президенти Владимир Путин делегация таркибини тасдиқлади ва ўзини бу рўйхатга киритмади. 15-май куни делегацияларнинг Истанбулдаги учрашуви бўлиб ўтмади. ОАВ музокаралар 16-май куни бошланиши мумкинлигини хабар қилди.