40 фоиздан ортиқ сайловчи овоз берди – сайловни ўтган деб ҳисоблаш мумкин

Олий Мажлис Қонунчилик палатаси ва халқ депутатлари вилоят, туман, шаҳар кенгашларига сайловларни бўлиб ўтган, деб ҳисоблаш мумкин.

«Сайлов кодексига мувофиқ, агар сайловчилар рўйхатига киритилган фуқароларнинг 33 фоизи овоз беришда иштирок этган бўлса, сайлов ўтган ҳисобланади.

Буни жойлардан ҳозиргача [соат 13:00га қадар] олинган қуйидаги маълумотлар ҳам тасдиқлайди. Ҳозирга қадар сайловчиларнинг 7 миллион 971 минг 252 нафари ёки 42,4 фоизи овоз берди.

Демак жорий сайловлар ўтган деб ҳисобланади ва бу билан барча сайлов жараёни иштирокчиларини, халқимизни табриклайман», деди Марказий сайлов комиссияси Котибияти раҳбари Худоёр Маматов.