Қатар кўчаларига кондиционерлар ўрнатиляпти

2022 йилда футбол бўйича жаҳон чемпионатига мезбонлик қиладиган Қатарда ҳаддан ташқари иссиққа қарши чора сифатида кўчаларга ҳам кондиционер ўрнатиляпти.

Ёз ойларида ҳаво ҳарорати 46 даражага чиқадиган Қатарда ёпиқ жойларда кондиционерсиз яшаб бўлмайди. Бунга қўшимча тарзда жаҳон чемпионатига тайёргарлик доирасида стадионларга ҳам кондиционерлар ўрнатилди.

Глобал исиш бутун дунёга таҳдид солаётган бўлса-да, ҳаво ҳароратининг ортишини энг кўп ҳис қилаётган мамлакатлардан бири Қатар ҳисобланади. Атроф муҳит ва энергия тадқиқотлари институти вакили Муҳаммад Аюбнинг Washington Post билан суҳбатда айтишича, дунёда ҳаво ҳароратининг ўртача 2 даражага ортиши ҳам Яқин Шарққа катта таъсир кўрсатади.

“Шундоқ ҳам иссиқ бўлган бу ҳудудда 4-6 даражалик ортиш бўлиши мумкин. Бундай ҳолат халқ саломатлигига ва самарадорликка қандай таъсир кўрсатишини текширяпмиз”, – дейди у.

Қатар аҳолисини қийнайдиган муаммолардан бири – нам даражасининг баландлиги. Очиқ майдонларга ўрнатилаётган кондиционерлар нам даражасини ҳам туширади.