Астрономлар тескари айланадиган ғайриоддий сайёрани аниқлади

Халқаро олимлар гуруҳи ўз юлдузи атрофида қарама-қарши йўналишда айланадиган Нептун ҳажмидаги сайёрани аниқлади. Бу ҳақда “SciTechDaily” хабар берди.

Қайд этилишича, астрономлар юқори аниқликдаги спектрограф ёрдамида ретроград орбитага эга бўлган GJ 3090 b экзосайёрасини кашф этган. Унинг орбитал ўқининг қиялик бурчаги тахминан 136 даражани ташкил этади, бу эса жисмнинг ёрқин юлдузнинг ўз айланиш йўналишига қарши ҳаракатланаётганини тасдиқлайди. Бу галактикадаги кичик ва совуқ юлдузларда қайд этилган биринчи шундай ҳодиса.

Одатда сайёралар ўз юлдузи билан бирга бир хил газ-чанг дискидан ҳосил бўлади ва у билан бир томонга ҳаракатланади. Аномалияни тушунтириш учун тадқиқотчилар экзосайёрани ўз тортишиш кучи билан йўлидан адаштириб юборган бўлиши мумкин бўлган бошқа массив жисмни атрофдан топишга ҳаракат қилган, аммо ҳеч нарса аниқлай олмаган. Энди мутахассислар илк босқичда тизим ташқи фазодан иккинчи дискни тутиб олган ва айнан у сайёрага янги йўналиш берган, деб тахмин қилмоқда.

Кашфиёт коинотда сайёралар тизимларининг шаклланиши ҳақидаги анъанавий қарашларни шубҳа остига қўймоқда. Олимлар қизил миттиларда бундай аномалиялар қанчалик тез-тез учрашини ва ташқи муҳит ёш юлдуз тизимларининг ривожланишига қандай таъсир қилишини аниқлаш учун объектни кузатишни давом эттиришни режалаштирмоқда.