FIFA президенти Жанни Инфантино Мексикадаги кескин вазият фонида 2026 йилги Жаҳон чемпионати ўйинларини мамлакатда ўтказиш масаласида хотиржам эканлигини маълум қилди. Бу ҳақда FIFA раҳбари Колумбияда бўлиб ўтган тадбирда журналистларга айтиб ўтди.
“Вазият тинч, ҳозир ҳаммаси нормал. Умуман олганда, барчаси муаммосиз ўтиши керак”, дейди Инфантино.
Маълумотларга кўра, жорий йилнинг 22 февраль куни “Халиско янги авлоди” гиёҳванд моддалар картели етакчиси Немесио Осегуэра Сервантеснинг (лақаби “Эль Менчо”) ўлдирилишидан сўнг Мексиканинг бир нечта ҳудудларида, жумладан, Гвадалахарада ҳам тартибсизликлар бошланган. Намойишчилар полицияга ҳужум қилган, автомобилларга ўт қўйилган ва дўконлар талон-торож қилинган. Расмийлар “қизил код” эълон қилиб, аҳолини уйда қолишга чақирган. Мамлакат аэропортларида 100 дан ортиқ рейс бекор қилинган.
Шу билан бирга, Мексика Президенти Клаудия Шейнбаум мамлакатнинг аксарият ҳудудларида вазият барқарор эканини маълум қилмоқда.
Маълумот учун, 2026 йилги Жаҳон чемпионати 11 июндан 19 июлгача учта давлат АҚШ, Мексика ва Канада мезбонлигида бўлиб ўтиши режалаштирилган. Мексикадаги учрашувлар Мехико, Монтеррей ва Гвадалахара шаҳарларида ташкил этилади.
Тасодифий хабарлар
«Қайси раҳбар рақамлаштиришни кечиктирса – очиқлик сиёсатимизга қарши чиққан бўлади» — Президент
Ўзбекистонда қанча одам ОИВ касаллиги билан яшаб келаётгани айтилди
Тошкентда 15 июль куни коронавирус аниқланган аёл вафот этди
Фарғонада ички ишлар ходими қўшмачи аёлдан пул ва жинсий алоқа сўради
Пригожинга ўлим ҳукми ўқилди – Украина разведкаси