Нетаньяху афв этилса, сиёсатдан кетадими?

Исроил Бош вазири Биньямин Нетаньяху кеча, 7 декабрь куни Қуддусда Германия канцлери Фридрих Мерц билан ўтказилган қўшма матбуот анжуманида коррупция иши бўйича суд жараёнлари тугаб, Президент томонидан афв этилса ҳам, сиёсий фаолиятини тўхтатмаслигини маълум қилди. 

Журналист Нетаньяхудан афв этилган тақдирда сиёсатдан кетишни режалаштираётгани ёки йўқлигини сўради. Исроил Бош вазири бу саволга қисқа қилиб “йўқ” дея жавоб қайтарди.

Маълумот учун, ўтган ойда Биньямин Нетаньяху Исроил Президенти Ицхаак Герцогга афв сўраб мурожаат қилган эди. Унинг адвокатлари тез-тез бўлаётган суд мажлислари Бош вазирни давлатни бошқаришдан чалғитаётганини ва афв мамлакат учун фойдали бўлишини рўкач қилган.

Таъкидлаш жоизки, Исроилда одатда суд жараёнлари якунланиб, айбланувчи айбдор деб топилгандан кейингина афв этиш амалиёти мавжуд. Ҳозиргидек суд жараёни ўртасида афв бериш бўйича тарихда прецедент кузатилмаган.

Нетаньяху пора олиш, фирибгарлик ва ишончни суиистеъмол қилиш айбловларини рад этиб келмоқда. Унинг ҳимоячилари суд жараёни тўлиқ якунланса, Бош вазир оқланишига ишонишини билдирган. 

АҚШ Президенти Дональд Трамп Нетаньяхунинг мурожаатидан аввал Исроил Президентига мактуб йўллаб, Бош вазирни афв этиш масаласини кўриб чиқишни сўраган. Исроилдаги мухолифат вакиллари эса ҳар қандай афв Нетаньяхунинг айбини тан олиши ва сиёсатдан кетиши шарти билан берилиши кераклигини талаб қилмоқда. Бошқалар эса 2026 йил октябрь ойига белгиланган сайловларни эртароқ ўтказиш кераклигини айтмоқда.