Трамп барчани зудлик билан Теҳронни тарк этишга чақирди

АҚШ Президенти Дональд Трамп барчани зудлик билан Эрон пойтахти Теҳронни тарк этишга чақирди. Бу ҳақда у кеча, 16 июнь куни ўзининг Truth Social ижтимоий тармоғида ёзди.

“Эрон мен уларга имзолашни айтган “битим”ни имзолаши керак эди. Бу шармандалик ва инсон ҳаётининг бекорга сарфланишидир. Оддий қилиб айтганда, Эрон ядровий қуролга эга бўла олмайди. Буни қайта-қайта айтиб келдим! Барча зудлик билан Теҳрондан эвакуация қилиниши керак!” деб ёзди Трамп.

Унинг ушбу баёноти АҚШ Оқ уйи томонидан ҳам Х ижтимоий тармоғида эълон қилинди. Унда айнан эвакуация ҳақидаги чақириқ алоҳида таъкидланган.

“Fox News”нинг ёзишича, АҚШ етакчиси Яқин Шарқда юзага келган вазият туфайли Миллий хавфсизлик кенгаши аъзоларини Оқ уйда йиғилиш ўтказишга чақирган. Шунингдек, маълумотларга кўра, Трамп Канадада ўтаётган G7 саммитини тарк этмоқда.

“Президент Трамп G7 саммитида ажойиб кун ўтказди, Буюк Британия Бош вазири Кир Стармер билан катта савдо келишувини ҳам имзолади. Кўп ишлар амалга оширилди, бироқ Яқин Шарқда юз бераётган воқеалар сабабли Президент Трамп бугун кечқурун давлат раҳбарлари билан кечки овқатдан сўнг саммитни тарк этади”, деган Оқ уй матбуот котиби Кэролайн Ливитт.

Шунингдек, Трамп Оқ уйдаги махсус вазиятлар хонасида Миллий хавфсизлик кенгашининг тўлиқ таркибда йиғилишга тайёр бўлишини сўрагани ҳам маълум қилинди.