Францияда “оқ халатдаги шайтон” 299 болани зўрлади

Францияда собиқ жарроҳ 299 нафар болага нисбатан жинсий зўравонлик қилгани учун 20 йилга озодликдан маҳрум этилди. Бу ҳақда “Sky News” хабар берди. 

Маълум қилинишича, 74 ёшли Жоэля Ле Скуарнек Францияда болаларга нисбатан содир этилган энг йирик жинсий жиноят ишларидан бирида айбдор деб топилган. У 1989 йилдан 2014 йилгача бўлган даврда содир этилган 111 та зўрлаш ва 188 та жинсий тажовуз – жами 299 та жиноят бўйича айбланган.

Таъкидланишича, жабрдийдаларнинг кўпчилиги зўравонлик содир бўлган пайтда наркозда ёки операциядан уйғонаётган бўлган. Уларнинг ўртача ёши 11 ёшни ташкил қилган. Жабрланганлар орасида деярли бир хил сонли ўғил ва қиз болалар бўлган. Икки нафар жабрланувчи судгача бўлган йилларда ўз жонига қасд қилган.

Прокурорлар Ле Скуарнекни “оқ халатдаги шайтон” деб атаб, унга энг юқори жазо – 20 йил қамоқ талаб қилган. Судья эса айбланувчининг айнан болалар энг ожиз ҳолатда бўлган вақтда уларга ҳужум қилганини алоҳида таъкидлаган.

Ле Скуарнек ўз жиноятларининг барчасини тан олган. У зўравонлик қилган ҳолатларни тафсилотлари билан дафтар ва кундаликларга ёзиб борган. Кўплаб жабрланувчилар ўзларига нисбатан содир этилган зўравонлик ҳақида фақат терговчилар уларнинг исм-шарифини ёзувлар орқали аниқлаб, боғлангач билишган.

“Мен уларда инсонни кўрмаганман. Улар менинг хаёлий фантазияларимнинг нишони эди. Суд жараёнида улар ҳаётий шахслар, ҳис-туйғулар, ғазаб, азоб ва қайғу билан яшаётган инсонлар эканини кўра бошладим”, деган жарроҳ суд жараёнида.

Ле Скуарнек фақат нафақага чиққачгина қўлга олинган. Унинг уйида тинтув пайтида полиция 300 мингдан ортиқ болаларнинг беҳаё сурат ва видеолари, 70 та болалар ўлчамидаги қўғирчоқлар, шунингдек, юзлаб дафтар ва кундаликларни топган. Улар жиноят тафсилотлари билан батафсил ёзилган бўлган.