Жорий йилнинг 25 декабрь куни Тошкентдаги "Humo Arena" комплексида россиялик 6 нафар тик-токер иштирокида "Тik Tok Fest" шоу-концерт дастури ўтказилиши режалаштирилмоқда. Унда иштирок этувчи тик-токерлар Аня Покров, Ваня Дмитриенко, Даня Милохин, Анет Сай, Артур Бабич, Егор Шип асосан ижтимоий тармоқда шарқ қадриятлари ва тарбиясига зид, оммавий маданият ниқоби остидаги, шунингдек бесоқолбозликни тарғиб қилувчи айрим чиқишлари билан “тилга тушган”. Шу боис ушбу шоу дастури жамоатчилик фаоллари томонидан танқидларга сабаб бўлмоқда. Кўпчилик шоунинг ташкил этилишида Ўзбекистон Республикаси Маданият вазирлигини айбламоқда. Ўз навбатида Маданият вазирлиги мазкур концертнинг ташкилий ишлари, жумладан лицензия беришда ҳам иштирок этмагани хусусида баёнот билан чиқиб, ташкилотчиларни ушбу масалага жиддий ёндашишга чақирди.
“Ўзбекистон Республикаси Президентининг ПФ- 6044-сон Фармони 2-иловаси 32-бандига мувофиқ, концерт-томоша тадбирига бир марталик рухсатнома бериш ваколатли бўлган — Ички ишлар вазирлиги, Маҳаллий ижроия ҳокимияти органлари томонидан амалга оширилади. Шу асосда, концерт-томошаларнинг савияси, мазмун-моҳияти, ғоясини таҳлил қилиш, томоша бўйича якуний хулосалар бериш ҳам Маҳаллий ижроия ҳокимлиги ҳузурида ташкил этилган тузилманинг вазифаси ҳисобланади.
Шунингдек, юқоридаги каби шоу-концерт томошаларини ташкил этиш Маданият вазирлиги томонидан эмас, хусусий тадбиркорлар томонидан амалга оширилади.
Шу боис, Маданият вазирлиги "Тik Tok Fest" шоу-концерти юзасидан барча савол ва мулоҳазаларни юқорида келтириб ўтилган ваколатли мутассадди органларга йўллашни тавсия қилади.
Дарҳақиқат, Ўзбекистон ҳудудида ўтказиладиган ҳар қандай маданий-маърифий тадбирлар, шоу-томошалар ҳамда концерт дастурлари ўзбек халқи миллий менталитети, ахлоқий тарбияси, тарихан бой маданияти, ёшлар дунёқараши бу каби шоу-дастурларни асло қабул қилмайди. Маданият вазирлиги "Тik Tok Fest" шоу-концертини маънавий жиҳатдан ёшлар онгига, дунёқарашига салбий таъсир этади, деб ҳисоблайди. Зеро, бир неча минг йиллардан буён шаклланиб, қон-қонимизга сингиб кетган инсоний фазилатлар, одоб-ахлоқ меъёрлари таъсирида пайдо бўлган тарбиямиз ҳам буни рад этади”, дейилади вазирлик баёнотида.
Тасодифий хабарлар
«Барселона» янги юлдузининг нархини 100 млн евро этиб белгилайди
Эртага Ўзбекистонда ҳаво ҳарорати 41 даражагача иссиқ бўлади
Ёлғон ахборот тарқатганлик учун “отнинг калласидек” жарима белгиланди
ФВВ зилзилалар бўйича янги мурожаат билан чиқди
«Ўзгидромет» байрам кунлари учун яхши хабарни эълон қилди