Наманган номи Guinness World Records расмий саҳифасида!

Наманган номи яна Guinness World Records расмий саҳифасида!

Наманган вилоятининг тарихий ютуғи — бир ой давомида жамоа томонидан энг кўп гул экиш бўйича ўрнатилган жаҳон рекорди Guinness World Records расмий веб-сайтида алоҳида мақола сифатида эълон қилинди.

Мақола «Ўзбекистон тарих яратди: Наманган минглаб инсонлар иштирокида гул экиш бўйича жаҳон рекордига эришди» сарлавҳаси остида чоп этилган. Унда ушбу рекорд жамоавий ҳамкорлик, экологик масъулият ва табиий гўзалликни улуғловчи улкан ташаббус сифатида эътироф этилган.

Расмий маълумотларга кўра, 2026 йил 20 апрелдан 20 майгача Наманган шаҳридаги битта ҳудудда жами 29 406 384 дона гул экилган. Натижада Наманган «бир ой давомида жамоа томонидан экилган энг кўп гул» йўналишида жаҳон рекордини ўрнатди.

Мақолада рекорд 65-Наманган халқаро гуллар фестивали доирасида амалга оширилгани қайд этилиб, фестиваль Ўзбекистон ва Марказий Осиёдаги энг йирик маданий ҳамда туристик тадбирлардан бири сифатида таърифланган.

Шунингдек, Наманган халқаро гуллар фестивали нафақат гуллар байрами, балки вилоятнинг меҳмондўстлиги, ижодкорлиги ва туризм салоҳиятининг ёрқин рамзи экани алоҳида таъкидланган.

Guinness World Records ушбу натижани шунчаки рекорд эмас, балки минглаб инсонларни эзгу мақсад йўлида бирлаштирган, жамоавий меҳнат ва экологик маданиятни тарғиб қилган йирик ижтимоий лойиҳа сифатида баҳолади.

Бу эътироф Наманган вилоятининг халқаро нуфузини янада мустаҳкамлаб, унинг жаҳон туризм харитасидаги ўрнини кучайтиришга хизмат қилмоқда.

Наманган — гуллар шаҳри.

Наманган — жаҳон рекордлари маскани.