Исроил вазири Фаластин байроғини кўтаргани учун Ямални танқид қилди

Исроил Мудофаа вазири Исроил Кац “Барселона” ҳужумчиси Ламин Ямални Фаластин байроғини кўтаргани учун кескин танқид қилди. Бу ҳақда вазир ўзининг Х ижтимоий тармоғида ёзиб қолдирди.

“Барселона” етакчиларидан бири бўлган Ламин Ямал 11 май куни жамоанинг чемпионлик паради вақтида Фаластин байроғини ҳилпиратган. Шундан сўнг Исроил Мудофаа вазири футболчини “Исроилга қарши нафрат қўзғатишда” айблаган.

Кац ижтимоий тармоғида ёзишича, Ямал “Исроилга қарши гижгижлаш ва нафратни кучайтириш билан шуғулланишни танлаган”, ҳолбуки Исроил аскарлари ҲАМАСга қарши уруш олиб бормоқда.

“Бундай баёнотларни қўллаб-қувватлайдиган ҳар ким ўзидан сўраши керак: бу унинг назарида инсонпарварликми? Бу ахлоқийми?” деб ёзган Кац ва “Барселона” клубини футболчи ҳаракатларини қоралашга чақирган.

Ламин Ямал чемпионлик парадида очиқ томли автобус устида Фаластин байроғини кўтарган ҳолда кўринган. Маҳаллий ҳокимият маълумотига кўра, парадга қарийб 750 минг киши йиғилган.

Ямал мусулмон динига эътиқод қилади. Унинг отаси Марокашдан, онаси эса Экваториал Гвинеядан. Парад ортидан футболчи Фаластин байроғи билан тушган суратини Instagram саҳифасига ҳам жойлаштирган.

Бу мавсумда Ямал “Барселона” сафида барча мусобақаларда 45 та ўйинда 24 та гол уриб, 18 та ассист қайд этган. Мавсум охирида эса жароҳат олди.

Испания ҳукумати ҳам Исроилнинг Ғазодаги ҳаракатларини мунтазам танқид қилиб келмоқда.