Тадбиркор Илон Маскнинг бойлиги 800 млрд доллардан ошди – “Forbes”

Америкалик тадбиркор Илон Маск бойлиги 800 миллиард доллардан ошган дунёдаги биринчи инсон бўлди. Бу ҳақда “Forbes” хабар берди.

Нашрга кўра, бу ҳолат Маскка тегишли SpaceX компанияси унинг ўзига қарашли бўлган, сунъий интеллектга ихтисослашган ва Grok чат-ботини ишлаб чиққан xAI компаниясини сотиб олганидан сўнг юз берган. “Forbes” баҳосига кўра, ушбу келишув Маскнинг бойлигини 84 миллиард долларга ошириб, рекорд даражадаги 852 миллиард долларга етказган.

“Forbes” талқинидаги энг бой инсонлар рўйхатида иккинчи ўринда Google ҳаммуассиси Ларри Пейж жойлашган. Нашр унинг бойлигини 281 миллиард долларга баҳолаган.

Битимгача Маск SpaceX акцияларининг 42 фоизига эгалик қилган бўлиб, уларнинг қиймати 336 миллиард долларни ташкил этган. Шунингдек, у xAI акцияларининг 49 фоизига эга бўлган, бу улуш 122 миллиард долларга баҳоланган. Келишувдан сўнг “Forbes” ҳисоб-китобларига кўра, Маск бирлашган компания акцияларининг 43 фоизига эгалик қилади ва уларнинг қиймати 542 миллиард долларни ташкил этади.

“Forbes” 2025 йилнинг 20 декабрида Маскнинг бойлиги 700 миллиард доллардан ошганини ёзган. Илон Маск нашрнинг энг бой тадбиркорлар рейтингида илк бор 2021 йил январида етакчилик қилган ва ўшанда унинг бойлиги 190 миллиард долларга баҳоланган.