Россияда террорчилик ҳаракатлари рекорд даражада кўпайди

Россияда 2025 йилнинг январь–сентябрь ойларида 4 467 та “террорчилик жинояти” қайд этилди. Бу сўнгги йиллардаги энг юқори кўрсаткич саналади. Бу ҳақда Россия Ички ишлар вазирлиги ҳужжатларига таяниб, ТАСС агентлиги хабар берди.

Келтирилишича, 2025 йилнинг тўққиз ойида Россия Ички ишлар вазирлиги 4500 га яқин террорчилик жиноятини қайд этган. Бу кўрсатгич ўтган йилги статистика билан солиштирганда кескин ўсганини кўрсатади.

Таққослаш учун, Россия Ички ишлар вазирлиги 2024 йилнинг шу даврида 2600 та шундай жиноятни қайд этган. 2023 йилнинг январидан сентябрига қадар уларнинг сони 1713 тани ташкил этган. 2022 йилнинг биринчи тўққиз ойида 1818 та жиноий ҳаракатлар қайд этилган.

Маълумотларга кўра, статистикага нафақат тайёрланган ёки содир этилган террорчилик ҳаракатлари, балки террорчилик фаолиятига кўмак бериш, оммавий чақириқлар, молиялаштириш, гаровга олиш, террорчи гуруҳ ташкил этиш ва унга аъзолик каби ҳолатлари ҳам киритилади.

Шунингдек, Россия Жиноят кодексида “экстремистик характердаги жиноятлар” сиёсий, мафкуравий, диний ёки миллий адоват асосидаги ҳаракатлар ҳамда ижтимоий гуруҳларга нисбатан нафрат уйғотишга қаратилган жиноятларни ўз ичига олади.

Россияда ҳар ой 300 киши “террорчи” ва “экстремист” деб эълон қилинади. 2025 йил октябрь ойи охирига келиб Росфинмониторингнинг “террорчилар ва экстремистлар” реестрида 18 771 киши қайд этилган.

Шуни алоҳида таъкидлаш керакки, Россия Украинага қарши уруш бошлагандан сўнг рўйхатдаги шахслар сони икки баравар ошган.

Эслатиб ўтамиз, аввалроқ Россия Ички ишлар вазирлигининг “қора рўйхати”дан 160 мингга яқин Ўзбекистон фуқароси чиқарилганлиги ҳақида хабар қилинганди.