Тошкентда ноқонуний қурилаётган “дом” майдони чўкиб кетди

Ижтимоий тармоқларда Тошкент шаҳрининг Яккасарой тумани Салар кўчаси Дилбулоқ маҳалласида жойлашган кўп қаватли уйлар ҳудудида ер чўкиши юзага келгани ҳақида хабарлар тарқалди. Ҳолат юзасидан пойтахт Қурилиш ва уй-жой коммунал хўжалиги соҳасида назорат қилиш инспекцияси маълумот берди.

Қайд этилишича, мазкур ҳудуддаги қурилиш ишлари “Люкс лойиҳа” МЧЖ томонидан ишлаб чиқилган лойиҳа ҳужжатлари асосида амалга оширилмоқда. Лойиҳа учун “Архитектура ва шаҳарсозлик кенгаши” ишчи органи ҳамда “Шаҳарсозлик ҳужжатлари экспертизаси” ДУКнинг ижобий хулосалари олинган.

Қурилиш объектининг А блоки Тошкент шаҳар Қурилиш ва уй-жой коммунал хўжалиги соҳасида назорат қилиш инспекциясидан белгиланган тартибда рўйхатдан ўтган. Шу кунга қадар инспекция томонидан объектда 10 марта мониторинг ўтказилиб, 11 та ёзма кўрсатма берилган. Шунингдек, қурилиш меъёр ва қоидаларига риоя қилинмагани сабабли буюртмачи 2 маротаба маъмурий жавобгарликка тортилган.

Бироқ, инспекция лойиҳанинг G4 блоки бўйича вазият бошқача эканини маълум қилган. Ушбу блок “Архитектура ва шаҳарсозлик кенгаши”дан ижобий хулоса олган бўлсада, “Шаҳарсозлик ҳужжатлари экспертизаси” ДУКдан хулоса олинмаган. Шу боис мазкур блок инспекцияда рўйхатдан ўтмаган ва қурилиш ишлари ноқонуний бошланган. Ҳолат юзасидан инспекция томонидан тегишли тартибда ҳуқуқни муҳофаза қилувчи органларга маълумот берилган.

Шунингдек, ўрганиш жараёнида буюртмачи “Ўзкоммаишийсавдо” МЧЖ томонидан G4 блок учун котлован қазиш ишлари олиб борилаётганда ҳудуддаги электр трансформаторида носозлик юзага келгани аниқланган. Шу сабабли котловандаги сизот сувларини чиқариш имкони бўлмаган, оқибатда сув даражаси кўтарилиб кетган. Бунинг ортидан эса қўшни “Grand Capital” МЧЖ томонидан илгари қурилган ерости автомашина тураржойининг қайта кўмилган жойларида тупроқ силжиши юз бериб, сирпанишга сабаб бўлган.