БАА-Ўзбекистон ўйинида чипта машмашаси: улар аллақачон сотилиб кетган

БАА-Ўзбекистон ўйинида чипта машмашаси: улар аллақачон сотилиб кетган

Жорий йилнинг 5 июнь куни Ўзбекистон миллий терма жамоаси ЖЧ-2026 саралаш босқичининг ҳал қилувчи ўйинларидан бирини Абу-Дабида Бирлашган Араб Амирликлари терма жамоасига қарши ўтказади. “Ол-Наҳаён” стадионида ўзбекистонлик мухлислар учун ажратилган ўринлар учун эса чипталар аллақачон сотилиб кетган. Буни чипталарни олиш мумкин бўлган ягона – “Ticketmaster.ae” платформасида кўриш мумкин.

Жами 15 минг 894 нафар томошбинни сиғдира оладиган “Ол Наҳаён” ўйингоҳидан ўзбекистонлик мухлислар учун 24, 25 ва 26-секторлар ажратилган. Ушбу секторлардан чипталарни харид қилиш учун паспорт маълумотларини киритиш талаб этилади. Мезбон секторлардан чипта харид қилган меҳмон жамоа мухлисларининг эса буюртмалари бекор қилинади. Яъни уларга махсус ажратилган секторлардан бошқа ўриндан чипта харид қилиш мумкин эмас. Олинган чипта билан эса ўйинни томоша қилиб бўлмайди. Уни сотиб олиш сарфланган пул эса 5-10 иш куни ичида қайтарилади. Одатда фақат инглиз ва араб тилларида юритиладиган ушбу платформага айнан шу маълумот учун янги қоида билан рус тили ҳам қўшилган. Бу эса кўплаб ўзбекистонлик мухлислар орасида норозилик ва муҳокамага сабаб бўлмоқда.

“Агар ростдан ҳам БАА резиденти бўлган ўзбекистонликларнинг чиптаси “куядиган бўлса”, буниси энди ғирт майнавозчилик. Ҳеч бўлмаганда бу ҳақда чипта олишдан аввал айтилиши керак эди, агар бу қоида аввалдан бўлганида чипта харид ҳам қила олмаган бўлардик”, деб ёзади “Sabitov” Telegram-канали муллифи.

Мухлисларнинг билдиришича, чипталар сотилиши эълон қилинган заҳоти тугаб қолган.

“Ўйинга чипта чиққан куни тўла сайтда ўтирдик. Умуман сотиб олиб бўлмади-ку, хаммаси сотиб бўлинган экан бир вақтни ўзида”, дея хитоб қилади мухлислардан бири.

Яна бир саёҳат агентлиги мутаххассиси Жамшид Суннатовнинг айтишича, ҳамма учун 5,5 доллардан сотилган чипталар “оптом” сотиб олинган бўлиши мумкин. Ўзбекистон терма жамоаси фан клуби учун ажратилган фан зона чипталарининг нархи эса 100 доллардан ва уларни фақатгина “ҳаммага таниш бўлган бир блогер” тарқата олади. Бундан ташқари, одатда БАА учун 300-400 доллар бўлган тур пакетлар нархи футбол арафасида 650-700 долларга кўтарилиб кетган.

Бунгача Ўзбекистон футбол ассоциацияси мазкур учрашувга қизиқиш юқори бўлгани учун айрим туристик компаниялар томонидан мухлисларга ўйин чипталари кафолатланган тур пакетлар таклиф этилаётганини билдириб, футбол мухлисларидан “ўйин чиптаси кафолатланган” пакетларни харид қилиш бўйича бир неча бор огоҳлантирган эди.

Маълумот учун, БАА-Ўзбекистон баҳси Тошкент вақти билан 21:00 да старт олади. Ҳозирда Ўзбекистон миллий терма жамоаси “А” гуруҳидан ўрин олган ва 8 та турда 17 очко жамғарган ҳолда 2-ўринни эгаллаб турибди. БААда 13, Қатарда 10 очко бор ҳамда мос равишда 3 ва 4-ўринларни банд этган. Амирликларга қарши ўйиндаги дуранг ҳам Ўзбекистон терма жамоасини Жаҳон чемпионатига олиб чиқади. Шу жиҳатдан мазкур ўйиннинг аҳамияти жуда юқори ва Ўзбекистон МТЖ ўз тарихида илк бор Жаҳон биринчилигига йўлланмани БААда нишонлаши мумкин.