Ўзбекистонда 100 нафар муҳтож аёл-қизнинг контракт пули тўлаб берилади

Вазирлар Маҳкамасининг 17 сентябрдаги қарори билан ота-онаси ёки уларнинг биридан айрилган муҳтож қизлар, боқувчиси йўқ ёлғиз аёлларнинг олий таълим олишларини моддий жиҳатдан қўллаб-қувватлаш тартиби тўғрисидаги низом тасдиқланди. Бу ҳақда Адлия вазирлигининг Telegram'даги «Ҳуқуқий ахборот» канали хабар берди.

Низомга кўра, Қорақалпоғистон Вазирлар кенгаши, вилоятлар ва Тошкент шаҳар ҳокимликлари 2021/2022 ўқув йилидан бошлаб ҳар йили ўз ҳудудларидан ўқишга кирган 25 нафардан ҳамда 2–4-курсларда ўқиётган 75 нафар (ҳар бир курсдан 25 нафардан), жами 100 нафар хотин-қизлар учун тўлов-контракт суммасини тўрт ўқув йилининг якунланишига қадар тўлаб беради. Молиявий барқарор давлат олийгоҳи томонидан уларнинг кенгаши қарорига мувофиқ 50 нафаргача хотин-қиз биринчи ўқув йилида бепул ўқитилади.

Қайд этилишича, бунда талабгорларнинг кейинги ўқув йиллари учун таълим кредитлари расмийлаштирилади. Ҳокимликлар ўз ҳудудларидаги талабгорлар учун учинчи шахс кафиллигини беради ҳамда ўқишни тамомлагандан сўнг уларни иш жойи билан таъминлайди. Талабгорларни танлаб олиш қуйидаги мезонлар асосида амалга оширилади:

• отаси ёки онаси ёхуд уларнинг иккаласи ҳам вафот этган муҳтож қизлар;
• боқувчиси йўқ эҳтиёжманд ёлғиз аёллар.

Таъкидланишича, бунда юқоридаги мезонларга мос келувчи хотин-қизлар тест натижалари эълон қилинган кундан бошлаб ижтимоий ҳолати тўғрисидаги маълумотномани ҳар йили 10 кун ичида олийгоҳ қабул комиссиясига тақдим этади. Давлат ОТМ 5 кун мобайнида рўйхатни шакллантириб, ҳокимликларга ёзма равишда маълумотларни юборади.

Шунга кўра, ота-онаси ёки уларнинг биридан айрилган муҳтож қизлар, боқувчиси йўқ ёлғиз аёллар олий таълим олишларини моддий жиҳатдан қўллаб-қувватлаш комиссияси 15 кунда (ҳар ўқув йилида 15 сентябрдан кеч бўлмаган муддатда) талабгорлар рўйхатини ҳамда шартномани имзолаш бўйича хулосаларни давлат ОТМга ёзма равишда киритади ва белгиланган тартибда шартномаларни расмийлаштиради.

Маълум қилинишича, бу тартиб тўлов-контракт асосида давлат ОТМ бакалавриатига (кундузни, сиртқи, кечки таълим шаклидан қатъи назар) талабаликка тавсия этилган ҳамда 2–4- курсларда таҳсил олаётган талабгорларга қўлланилади. Қуйидагиларга нисбатан эса татбиқ этилмайди:

• иккинчи ва ундан кейинги олий таълим олиш учун танловда иштирок этган талабгорларга;
• Ўзбекистонда жойлашган хорижий ОТМ ёки уларнинг филиаллари, нодавлат таълим хизматлари билан шуғулланувчи тадбиркорлик субъектларига;
• олий ҳарбий таълим муассасаларига.

Шунингдек, талабгорлар жорий ўқув йили давомида ОТМни ёки таълим йўналишини ўзгартирса, ёхуд талабалар сафидан четлаштирилса, бу имтиёздан фойдалана олмайди. Талабгорларни танлаб олиш натижалари «Aziz-ayol.uz» Ягона интерактив миллий платформаси орқали эълон қилинади.