Вилоят соғлиқни сақлаш бошқармасининг халқаро йўналишларда юк ташувчи Наманганлик ҳайдовчиларга мурожаати

Синовли кунларда жиддий ташвиш туғдираётган хавфлардан бири — узоқ ва яқин хорижга қатновчи юк машиналари ҳайдовчиларининг карантин қоидаларига амал қилмаслиги билан боғлиқ. Белгиланган тартибларга кўра, бу тоифа инсонлар вилоятга кириб келишлари чоғида қатъий равишда коронавирус инфекциясига тиббий текширувга жалб этилади. Бунинг учун тегишли мутахассислардан иборат тизим хизмати йўлга қўйилган. Аммо шундай муҳим ва зарур амалиётдан бўйин товлаш ва ўзини четга олиш ҳолатлари ҳам кузатилмоқда.

Ўзга юртларда бўлиб Наманганга қайтяпсизми, демак, сизга санитария-эпидемиологик вазиятга таҳдид туғдирувчи сифатида гумон билан қаралиши табиий. Яъни сизнинг тўла соғлом ва коронавирусни юқтириб олмаганлигингизга кафолат йўқ. Барча гумонлардан холи бўлиш учун эса оилангиз ва яқинларингиз олдига боришдан аввал, биринчи навбатда тиббий текширувлардан ўтишингиз, белгиланган тартибга мувофиқ алоҳидаланишингиз зарур!