Рўйхатга олинмаган қурол ва ўқ-дориларини Миллий гвардия органларига ўз ихтиёри билан топширган фуқароларга пул мукофоти берилади

Норматив-ҳуқуқий ҳужжатлар лойиҳалари муҳокамаси порталига Вазирлар Маҳкамасининг “Рўйхатга олинмаган қурол ва унинг ўқ-дориларини Ўзбекистон Республикаси Миллий гвардияси органларига ўз ихтиёри билан топшириш ҳамда уларни топширганлик учун тақдирлаш тартиби тўғрисидаги низомни тасдиқлаш ҳақида”ги қарори лойиҳаси жойлаштирилди.

Мазкур низомнинг 5-иловасига кўра, рўйхатга олинмаган қурол ва ўқ-дориларини Миллий гвардия органларига ўз ихтиёри билан топширган фуқаролар энг кам иш ҳақининг беш бараваригача пул мукофоти билан тақдирланадилар.

Ўзбекистон Республикаси Жиноят кодексининг 248-моддасига мувофиқ ўқотар қуролни ва ўқ-дориларни ўз ихтиёри билан топширган фуқаро қонун ҳужжатларида белгиланган жавобгарликдан озод қилинади.

Фуқаро қурол ва ўқ-дориларни ўз ихтиёри билан топшириш тўғрисида қарорга келса ва унинг ўзи ушбу ашёларни топшириш ҳақида Миллий гвардия органларига ёзма ёки оғзаки равишда мурожаат қилса, у ашёларни ўз ихтиёри билан топширган ҳисобланади.

Фуқаро тинтув жараёнида ёки унда қурол ва ўқ-дорилар борлиги ҳақида далиллар келтирилиши натижасида уларни топшириш тўғрисидаги қарорга келса, у ушбу ашёларни ўз ихтиёри билан топширган ҳисобланмайди.