АҚШнинг “Пью рисерч сентер” таҳлил маркази дунёдаги диний таркиб қандай ўзгариши ҳақидаги янги прогнозини эълон қилди. Мутахассисларнинг фикрича, 2035 йилга бориб мусулмонлар сони насронийлардан ошади. Шундан кейин Ислом сайёрамизда энг кўп эътиқод қилинадиган динга айланади.
Рақамлар нима дейди
2020 йилда насронийлар энг йирик диний гуруҳ эди. Уларнинг сони 2,27 миллиардни, мусулмонларники эса 2,02 миллиардни ташкил этган. Прогнозга кўра, 2035 йилда мусулмонлар 2,57 миллиардга етади, насронийлар эса 2,52 миллиард бўлади.
Фарқ кейинги ўн йилликларда яна катталашиши мумкин. Ҳозирги тенденция сақланса, 2070 йилга бориб мусулмонлар сони 3,6 миллиарддан ошади. Насронийлар эса 3 миллиардга ҳам етмайди. Ҳисоб-китобда аҳолининг ёш таркиби, туғилиш даражаси, динни ўзгартириш ва миграция ҳам эътиборга олинган.
Марказ асосий сабаб сифатида мусулмон оилаларда болалар кўплигини кўрсатмоқда. 2020–2025 йилларда битта мусулмон аёлга ўртача 3,1 нафар фарзанд тўғри келган. Насроний аёлларда бу кўрсаткич 2,5 нафар бўлган. Бошқа диний гуруҳларда у 1,6 ни ташкил этган. Аҳоли сонини авлоддан авлодга сақлаш учун эса 2,1 кўрсаткич керак деб ҳисобланади.
АҚШ ва Европада вазият
Прогноз фақат жаҳон миқёси билан чекланмайди. АҚШда насронийлар ҳозир катта ёшли аҳолининг 62 фоизини ташкил этади. 2065 йилга бориб бу улуш 50 фоиздан пастга тушиши мумкин. Демак, тахминан 40 йилдан кейин насронийлар мамлакатда кўпчилик бўлмай қолиши эҳтимол.
Европада эса динга эътиқод қилмайдиганлар кўпаяди. 2020 йилда улар аҳолининг 25 фоизини ташкил этган эди. 2070 йилга келиб бу кўрсаткич қарийб 33 фоизга етиши мумкин. Мусулмонлар улуши ҳам деярли икки баравар ошиб, 6 фоиздан 13 фоизга чиқиши кутилмоқда.
Прогнозлар ҳозирги демографик тенденциялар сақланиб қолишига асосланган. Улар келгуси ўн йилликларда дунёнинг диний харитаси сезиларли ўзгаришини кўрсатади. матн>









