Роналду фаолиятидаги 980-голини урди

9 октябрь куни беш карра “Олтин тўп” соҳиби Криштиану Роналду Саудия Арабистони чемпионати доирасида “Ал-Дирия”га қарши учрашувда “Ал-Наср” сафида гол уриб, профессионал фаолиятидаги голлари сонини 980 тага етказди.

Португалиялик ҳужумчи учрашувнинг 23-дақиқасида ҳисобни очди. Шундан сўнг, мезбонлар 35- ва 77-дақиқаларда яна икки бор рақиб дарвозасини ишғол қилди. Натижада “Ал-Наср” 3:0 ҳисобида ғалаба қозонди.

Аввалроқ, Роналду терма жамоа йиғинини муддатидан олдин тарк этган эди. Футболчининг айтишича, бунга бош мураббий Жорже Жезуш унга берган ваъдаларини икки марта бажармагани сабаб бўлган.

Роналду Миллатлар лигасининг янги мавсумида Уэльсга қарши кечган ва 1:0 ҳисобида якунланган учрашувда майдонга тушган. Бироқ Норвегияга қарши баҳсда (2:1) захирада қолдирилган. Футболчининг таъкидлашича, дастлаб у мазкур ўйинда иштирок этиши режалаштирилмаган, аммо мураббий ундан 30 дақиқа ўйнашга тайёр туришни сўраган. Шунга қарамай, Роналду ўйинга туширилмаган.

41 ёшли Роналду беш карра Чемпионлар лигаси ғолиби, Европа чемпиони ва Миллатлар лигасининг икки карра ғолиби ҳисобланади. У миллий терма жамоалар, Европа чемпионатлари ва Чемпионлар лигасидаги голлари бўйича қатор рекордларга эга.

Роналду 2022 йил декабрь ойидан буён “Ал-Наср” сафида тўп сурмоқда. У фаолияти давомида клублар сафида 834 та, Португалия терма жамоасида эса 146 та гол урган.