Президент Осиё ўйинлари иштирокчиларини табриклади

Президент Шавкат Мирзиёев Японияда бўлиб ўтган ХХ ёзги Осиё ўйинларида иштирок этган Ўзбекистон спорт делегацияси аъзоларига табрик йўллади. Бу ҳақда Президент матбуот хизмати хабар берди.

“Сиз, азизларни Япониянинг Аичи-Нагоя шаҳрида бўлиб ўтган XХ ёзги Осиё ўйинларида муваффақиятли иштирок этиб, том маънода тарихий натижаларни қўлга киритганингиз билан чин юракдан самимий табриклайман.

Ватанимиз байроғини баланд кўтариб, юртимизга ёруғ юз, ёрқин ғалабалар билан қайтиб келганингиз муборак бўлсин!

Сизлар Осиё минтақасининг 45 давлатидан 11 мингга яқин спортчи иштирок этган, ғоят кескин курашлар остида ўтган ушбу нуфузли мусобақаларда чинакам маҳорат, жасорат ва матонат фазилатларини намоён этиб, мамлакатимиз спорти тарихида яна бир буюк саҳифа очдингиз”, дейди Ўзбекистон етакчиси.

Президент миллий терма жамоа 21 та олтин, 25 та кумуш ва 24 та бронза медали билан Хитой, Япония, Жанубий Корея ва Ҳиндистондан кейин бешинчи ўринни эгаллагани Янги Ўзбекистоннинг спорт соҳасидаги салоҳиятидан, мард ва баҳодир фарзандларнинг қандай улуғ ишларга қодир эканидан далолат эканини қайд этган.

“Бу, ҳеч шубҳасиз, барчамизга, кўп миллатли бутун халқимизга чексиз ғурур ва ифтихор бағишлайди.

Ўзбекистон ушбу ўйинларда Марказий Осиё мамлакатлари ва Ислом ҳамкорлик ташкилоти давлатлари орасида биринчи ўринни эгаллагани ҳам албатта эътиборлидир”, дейди Ўзбекистон раҳбари.

Шавкат Мирзиёев дастлаб Абдулваҳоб Рашидов эркаклар ўртасидаги каратэ баҳсларида, Шоҳсанам Шерзодова якка ҳолда каноэда эшкак эшиш дастурида, Ўткирбек Жўраев эса спорт гимнастикаси бўйича Ўзбекистоннинг Осиё ўйинларидаги биринчи ва тарихий олтин медалларини олишга муваффақ бўлгани терма жамоа аъзоларини юксак марралар сари руҳлантиришда муҳим аҳамият касб этганини билдирган.

“Ғайрат ва шижоатда тенгсиз бўлган енгил атлетикачиларимиз Суҳроб Хўжаев босқон улоқтириш йўналишида Осиё ўйинларининг олтин медалини қўлга киритган биринчи ўзбек спортчисига айланди, баландликка сакраш бўйича 1,90 метрлик натижа қайд этган Барнохон Сайфуллаева олтин медални қўлга киритиш билан бирга ўзининг шахсий рекордини ҳам янгилади.

Ёшларимизнинг катта спортда ўз ўрнини дадил эгаллаб бораётгани барчамизни ғоят қувонтиради, албатта. Енгил атлетикачимиз Шарифа Давронова, боксчимиз Абдумалик Халлаков икки карра, бадиий гимнастика бўйича Тахмина Икромова уч карра Осиё ўйинлари чемпиони деган шарафли номга сазовор бўлиб, қитъамизда тенгсиз эканини исботладилар”, дейди Ўзбекистон етакчиси.

Президент академик эшкак эшиш бўйича яқинда бўлиб ўтган жаҳон чемпионатида тарихий олтин медални қўлга киритган Шаҳзод Нурматов ва Собир Сафаралиев жуфтлиги муросасиз кечган Осиё ўйинлари баҳсларида ҳам етакчиликни сақлаб қолганини эътироф этган.

“Марди майдон спортчиларимиз Осиё ва жаҳон рекордларини янгилаб, спорт тарихига ўз номларини зарҳал ҳарфлар билан муҳрлаб қўйганлари мусобақаларнинг энг ёрқин саҳифаларини ташкил этди, десак, тўғри бўлади. Жумладан, афсонавий оғир атлетикачимиз Акбар Жўраев 197 килограмм натижа билан жаҳон ва Осиё рекордини янгилашга эришди. Ғоят драматик руҳда кечган беллашувларда бу полвонимиз Осиё ўйинлари рекордини ўрнатгани мухлислар қалбидан чуқур жой олган унутилмас воқеага айланди.

Ўқ отиш бўйича Владимир Свечников эса Осиё ўйинлари олтин медалини биринчи марта Ўзбекистонга олиб келгани ва Осиё ўйинлари рекордини ўрнатгани – буям тарих, буям ғурур, буям қаҳрамонликдир”, дейилади Президентнинг табрик мактубида.

Шунингдек, Ўзбекистон етакчиси дзюдочи Музаффарбек Тўрабоев ўзига хос жасорат кўрсатиб, чорак финалда кореялик рақиби, Париж–2024 олимпиадаси совриндори Ким Мун Жонгни, финал баҳсида эса дзюдо ватани бўлмиш Япония вакили Ота Ҳёгани мағлуб этиб, Осиё ўйинларида 2 та вазн тоифасида ғалаба қозонган илк чемпион сифатида тарихга кирганини алоҳида қайд этган.

Шу ўринда ўзбек дзюдочиларининг 2 та олтин, 2 та кумуш ва 3 та бронза медалини қўлга киритиб, 32 давлат вакиллари иштирокидаги кучли рақобат шароитида Япониядан кейин умумжамоа ҳисобида иккинчи ўринни эгаллагани Ўзбекистон дзюдо спортидаги энг йирик ва салмоқли натижа экани эътироф этилган.

“Уч минг йиллик тарихга эга бўлган ўзбек кураши бўйича полвонларимиз ҳам халқимизнинг ишончини муносиб тарзда оқлади. Ушбу йўналишда 6 та олтин медалнинг тўрттасини Аҳрор Зиёдуллаев, Шоҳруххон Бахтиёров, Ибодатхон Агожонова ва Покизахон Камолдинова қўлга киритиб, делегациямиз ҳисобига қўшиб қўйгани учун уларга тасаннолар айтамиз.

Ўз ғалабалари тарихи, маҳорат мактабини яратаётган мана шундай алп ўғлонларимиз, дилбар қизларимизга шон-шарафлар бўлсин!” дейди Шавкат Мирзиёев.

Ўзбекистон Президенти Осиё ўйинларида эришилган ҳар бир ютуқ, ҳар бир ҳаяжонли дақиқа одамлар учун ўзига хос байрам, завқ ва қувонч айёми эканини қарийб бир ой давомида ўзбекистонликлар чин дилдан ҳис этиб яшаганини урғулаган.

“Албатта, бепоён Осиё қитъасининг ўзига хос Олимпия ўйинлари бўлган ушбу мусобақалардаги юксак натижалар ўз-ўзидан бўлгани йўқ. Уларнинг замирида мамлакатимизда жисмоний тарбия ва спортни ривожлантиришга қаратилган кенг кўламли ислоҳотлар, яратилаётган шароитлар, ёш истеъдод эгаларини қўллаб-қувватлаш бўйича амалга ошираётган ишларимиз мужассамдир.

Фурсатдан фойдаланиб, бизга мана шундай унутилмас ғалабаларни тақдим этган барча спортчиларимизга, уларнинг ота-оналарига, олтинга тенг маслаҳат ва кўрсатмалари билан улкан зафарларга муносиб ҳисса қўшган жонкуяр устоз ва мураббийларга, атлетларимизни доимо қўллаб-қувватлаб турган кўп сонли мухлисларга ўз номимдан, халқимиз номидан самимий миннатдорлик изҳор этаман”, дейилади Президентнинг табрик хатида.

Ўзбекистон етакчиси спортчиларга мурожаат қилиб, улар Осиё ўйинларидаги ғалабаси билан Янги Ўзбекистонда Олимпия ҳаракати ривожи янги босқичга кўтарилгани, бу йўлда янги олтин авлод шаклланганини бутун дунёга намоён этганини билдирган ва Япония заминида эришилган ютуқ ва натижалар, тўпланган тажрибалар 2028 йилда Лос-Анжелесда ўтадиган Олимпия ўйинлари учун мустаҳкам замин бўлиб хизмат қилишига ишонч билдирган.

“Сизлар жаҳоннинг ана шу энг нуфузли ўйинларига ҳам албатта муносиб тайёргарлик билан борасиз! Келгуси фаолиятингиз янада ёрқин зафарларга албатта бой бўлади!

Янги Ўзбекистоннинг буюк спорт солномасини яратишда сизларга ютуқ ва омад ҳамиша ёр бўлсин, азиз фарзандларим!” дейилади табрик якунида.