Ўзбекистон аҳолисида қанча автомобиль бор?

Ўзбекистонда аҳолига тегишли автотранспорт воситалари сони 5 миллионга яқинлашди. Бу ҳақда Миллий статистика қўмитаси хабар берди.

Маълумотларга кўра, 2026 йилнинг 1 апрель ҳолатига Ўзбекистонда жисмоний шахсларга тегишли 4 млн 903 мингдан зиёд автотранспорт воситалари рўйхатга олинган.

Уларнинг асосий қисмини енгил автомобиллар (жамига нисбатан улуши 92,8 %) ташкил этади. Қайд этилишича, 2025 йилнинг мос даврига нисбатан автомобиллар сони 344,6 мингтага ошган.

Жисмоний шахсларга тегишли автотранспорт воситалари турлари бўйича қуйидагича тақсимланган:

• енгил автомобиллар – 4 552,3 минг дона;
• юк автомобиллари – 330,3 минг дона;
• микроавтобуслар – 7,5 минг дона;
• махсус транспорт воситалари – 7,2 минг дона;
• автобуслар – 5,8 минг дона.