Трамп, Путин ва Зеленский учрашиши мумкин

Украина Президенти Владимир Зеленский ўз музокара гуруҳига Женевада Украина, АҚШ ва Россия етакчилари даражасидаги учрашувни ташкил этиш вазифасини топширганини маълум қилди. Бу ҳақда у кеча, 18 февраль куни “Axios” нашрига берган интервьюсида айтган.

Зеленскийнинг сўзларига кўра, ҳудудий масала бўйича музокараларда силжишга эришишнинг энг яхши йўли – Россия Президенти Владимир Путин билан шахсан учрашишдир. Шу муносабат билан у олий даражадаги тегишли алоқаларни тайёрлаш бўйича топшириқ берган.

Нашр хабарига кўра, америкалик воситачилар можарони ҳал этишнинг шундай вариантини таклиф қилган: унга кўра, украин қўшинлари ўзлари назорат қилаётган Донбасс ҳудудларидан чиқиб кетади, мазкур ҳудуд эса демилитаризация қилинган “эркин иқтисодий зона” мақомини олади. Айни пайтда Вашингтон ушбу ҳудуд устидан қайси давлат суверенитетга эга бўлиши масаласида аниқ позиция билдирмаган.

Зеленский қўшинларни олиб чиқиш масаласини муҳокама қилишга тайёрлигини айтган, бироқ Москвадан ҳам ўз кучларини тенг масофага чекинишига чақирган ва Россиянинг мазкур зона устидан суверенитет даъволарини рад этган.

Украина Президенти, шунингдек, музокараларнинг иккинчи босқичида Россия вакиллари Москва раҳбарияти билан маслаҳатлашиб, ҳудудий масала юзасидан янада батафсил позиция тақдим этишга ваъда берганини маълум қилган.