Қодиров Украинадаги уруш охиригача олиб борилиши кераклигини айтди

Чеченистон раҳбари Рамзан Қодиров Украинадаги урушни тугатиш бўйича музокараларга қарши эканини ва Москва ҳарбий ҳаракатларни давом эттириши лозимлигини билдирди. Бу ҳақда у бугун, 29 январь куни журналистлар билан суҳбатда сўз очди.

Ўзини Путиннинг “пиёда аскари” деб атайдиган Қодиров журналистлар билан суҳбатда уруш масаласига тўхталган. Унинг баёнотига кўра, тўрт йилдан буён давом этаётган урушда Россия чекиниши керак эмас.

“Менимча, урушни охирига етказиш керак. Мен музокараларга қаршиман”, деди Рамзан Қодиров.

Шу билан бирга, Чеченистон раҳбари урушни қачон ва қандай тўхтатиш масаласи фақатгина Президент Владимир Путиннинг ихтиёрида эканини қўшимча қилган. 

Кремль эса Россия Украинадаги мақсадларига, аввало, дипломатик йўл билан эришишни афзал кўришини, бироқ бу имконсиз бўлса, ҳарбий чоралар давом эттирилишини билдирган.

Бу фикрлар айнан АҚШ Президенти Дональд Трамп можарони якунлаш учун дипломатик саъй-ҳаракатларни кучайтираётгани бир пайтда янгради.