Ҳусанов “Манчестер Сити” асосий таркибига қайтди

Кеча, 17 декабрь куни Англия Лига кубоги чорак финали доирасида “Манчестер Сити” ўз майдонида “Брентфорд” жамоасини қабул қилди. Мазкур учрашувда Ўзбекистон терма жамоаси ҳимоячиси Абдуқодир Ҳусанов узоқ танаффусдан сўнг асосий таркибда майдонга тушди.

Ҳусанов бундан аввал жорий йилнинг 26 ноябрь куни Чемпионлар лигаси доирасида “Байер Леверкузен”га қарши баҳсда илк дақиқалардан ўйнаган эди. Шундан сўнг у асосий таркибда майдонга тушмаганди.

“Брентфорд”га қарши ўйинда Абдуқодир Ҳусанов тўлиқ 90 дақиқа ҳаракат қилди. У учрашувнинг 16-дақиқасида сариқ карточка олганига қарамай, майдондаги энг фаол ва ишончли футболчилардан бири бўлди. Sofascore портали ўзбекистонлик ҳимоячининг ўйинини 7,2 балл билан баҳолади. Бу ҳимоячилар ичидаги энг яхши кўрсатгич ҳисобланади.

Учрашувда Пеп Гвардиола шогирдлари Райан Шерки ва Савиньонинг голлари эвазига 2:0 ҳисобида ғалаба қозониб, Англия Лига кубоги ярим финалига йўл олди.