iPhone эгалари зудлик билан iOS тизимини янгилашга чақирилди

Apple компанияси Mac ва iPhone қурилмалари учун хавфли заифликни бартараф этувчи янги дастурий таъминот янгиланишини чиқарди. Бу ҳақда MacRumors портали хабар берди.

Июль ойи охирида чиқарилган iOS 18.6 ва macOS Sequoia 15.6 версияларида CVE-2025-6558 номли жиддий заифлик бартараф этилди. Мазкур заифлик хакерларга Chrome браузерининг хавфсизлик деворларини айланиб ўтиб, “қумлоқ майдон” (sanbox) ташқарисида ихтиёрий кодни бажариш имконини берган.

Заифлик Safari браузерининг асоси бўлган WebKit “движоки”га ҳам таъсир қилган. Бу эса зарарли веб-контентни қайта ишлашда тизим хатоликларига олиб келиши мумкин.

Хабарларга кўра, Google бу заифликни жорий йилнинг 15 июль куни Chrome браузерида бартараф этган. Бироқ заифлик Apple операцион тизими компонентларига чуқур интеграциялашгани сабабли iPhone ва Mac учун алоҳида тизим янгиланиши талаб этилган.

Ҳозирча ушбу эксплуатациянинг (заифликдан фойдаланиш усули) техник тафсилотлари ошкор этилмаган. Маълумки, заифлик ҳақиқий киберҳужумларда аллақачон ишлатилмоқда, шу сабабли Google аксарият фойдаланувчилар “ҳимоя ямоқлари”ни ўрнатмагунча тафсилотларни эълон қилмаслигини билдирган.