2 млрд долларлик сирли биткоин ҳамёни 14 йил деганда “жонланди”

Жорий йилнинг 3-4 июль кунлари эгаси номаълум бўлган иккита сирли криптовалюта ҳамёни 14 йиллик сукутдан сўнг яна фаоллашди. Уларда ҳозирда 2 миллиард доллардан ортиқ маблағ сақланмоқда. Бу ҳақда “The Block” нашри хабар берди.

“Блокчейн маълумотларига кўра, 14 йилдан ортиқ муддат давомида ҳеч қандай операция амалга оширилмаган иккита биткоин ҳамёни – ҳар бири 10 минг BTC сақловчи манзил 3 ва 4 июль кунлари қайта фаоллашди”, дейилади хабарда.

Маълум бўлишича, ушбу “ухлаб ётган” (яъни, ҳеч қандай транзакция қилинмаган) ҳамёнлар 14 йил давомида “қимир этмаган”. Ўша вақтда уларнинг умумий қиймати атиги 7 800 доллар бўлган, бугунги кунда эса уларнинг ҳар бири 1,1 миллиард долларга баҳоланмоқда. Бу – 13 982 800 фоиз ўсишни англатади.

Шунингдек, биткоин нархи 3 июль куни 2 фоиздан кўпроққа ошиб, жорий йилнинг 11 июндан буён илк бор 110 минг доллардан юқори кўрсаткичга етди.