Токиода жиноят содир этишда гумонланган ўзбекистонликлар қўлга олинди (видео)

Япония пойтахти Токионинг Шибуя ва Шинжуку туманларида содир этилган бир нечта жиноятларда гумон қилинган 5 нафар Ўзбекистон фуқароси Токио полицияси томонидан қўлга олинди. Бу ҳақда “Tokyo reorter” хабар берди.

Нашрга кўра, 2023 йил 30 декабрь куни маҳаллий вақт билан тахминан соат 5:30 да 21 ёшли Ҳ.Д. ва унинг шериклари Шибуя туманининг Маруямачо ҳудудидаги кўчада 3 нафар чет элликдан иборат гуруҳга ҳужум қилган. Ҳ.Д. 21 ёшли эркакнинг юзига тепганидан сўнг шериклари билан жами 210 минг иена қийматидаги ҳамён ва сумкаларини ўғирлаган.

Нашрнинг ёзишича, жабрланувчига тан жароҳати етказган ҳолда талончилик содир этганликда гумонланиб, қўлга олинган Ҳ.Д. терговга адвокати келмагунча гапирмаслигини айтмоқда. Бошқа 4 гумондор эса айбловларни рад этмоқда.

5 гумондордан тўрт нафари, жумладан Ҳ.Д. ҳам Японияда ноқонуний яшаб келаётгани аниқланган. Гумондорлар воқеа содир бўлишидан олдин нишонга олинган гуруҳдаги аёл аъзо билан танишишга уринган.

Полиция маълумотига кўра, Ҳ.Д. ва унинг шериклари ўтган йилнинг август ойидан бери Шибуя ва Шинжуку каби гавжум ҳудудларнинг кўчаларида ухлаётган одамларнинг чўнтакларига “қўл солиш” каби бошқа жиноятларни ҳам содир этган бўлиши мумкин.

Шунингдек, улар ўғирланган кредит карталари орқали iPhone телефонларини сотиб олиб, уларни қайта сотиш орқали қарийб 8 миллион иена фойда кўрганликда ҳам гумон қилинмоқда.

Полициянинг айтишича, бу гуруҳга Ҳ.Д. раҳбарлик қилган ва жиноятлар қачон ва қаерда содир этилишини Telegram орқали бошқаларга билдирган. Ҳолат бўйича бошқа тафсилотлар маълум эмас. Тергов жараёнлари давом этмоқда.