АҚШдаги аёллар қамоқхоналарида сўнгги беш йилда ходимлар 185 дан ортиқ марта жинсий зўравонлик қилгани қайд этилди. Бу ҳақда америкалик ПроПаблика ва «Маршалл проджект» нашрлари биргаликда ўтказган суриштирув натижаларида айтилган.
Журналистлар тўплаган маълумотларга кўра, 16 та қамоқхонада 96 нафардан ортиқ маҳбус жабрланган. Ҳолатлар битта муассасада эмас, мамлакатнинг турли жазони ижро этиш жойларида кузатилган. Бу муаммо алоҳида ходимларнинг хатти-ҳаракати билан чекланмаётганини кўрсатади.
Жавобгарликка тортилганлар жуда оз
Энг эътиборли жиҳат шуки, гумонланувчилардан фақат 19 нафари ҳибсга олинган ёки судланган. Яъни жабрланганлар сони ва қайд этилган ҳолатлар сонига нисбатан жазоланганлар кескин кам. Аёллар ўз ҳуқуқини ҳимоя қилиш имкониятидан деярли маҳрум бўлаётгани ана шундан билинади.
Қамоқхонада маҳбус ходимга тўлиқ қарам бўлади. Шу сабабли бундай ҳолатлар ҳақида гапириш ҳам осон кечмайди.
Шикоят қилганларга таҳдид
Суриштирувда яна бир ташвишли ҳолат аниқланган. Айрим ходимлар маҳбусларга озиқ-овқат ва тиббий ёрдам беришдан бош тортган. Шикоят қилишга уринганларни эса жазолаш билан қўрқитган.
Бундай босим жабрланганларни жим туришга мажбур қилади. Шунинг учун расман қайд этилган рақамлар ҳақиқий аҳволни тўлиқ акс эттирмаслиги мумкин.
Ислоҳот ваъдаси амалга ошмадими
2021 йилда Дублин қамоқхонасида шунга ўхшаш ҳолатлар ошкор бўлганидан кейин тизимни ўзгартириш ваъда қилинган эди. Лекин суриштирувни олиб борган журналистларнинг таъкидлашича, орадан бу қадар вақт ўтса-да, сезиларли ўзгаришлар юз бермаган.
Шу тариқа аёллар қамоқхоналаридаги зўравонлик масаласи АҚШда ҳамон долзарблигича қолмоқда. Ваъда қилинган ислоҳотлар қанчалик жиддий амалга оширилиши энди жамоатчилик ва оммавий ахборот воситалари назоратида бўлади.









