Майкл Жексон ҳақидаги фильм рекорд ўрнатди

Режиссёр Антуан Фукуанинг “Майкл” фильми жаҳон прокатида 977 миллион доллар тўплаб, Кристофер Ноланнинг “Оппенгеймер” фильмини (ушбу фильм 975 миллион доллар йиғган эди) ортда қолдирди ва тарихдаги энг кассабоп биографик фильмга айланди. Бу ҳақда “Variety” хабар берди.

Қайд этилишича, намойишлар бошланганидан буён “Майкл” фильми АҚШнинг ўзида 370,2 миллион доллар, жаҳон прокатида эса 607 миллион доллар жамғарган. Картина 911 миллион доллар тўплаган “Боҳем рапсодияси” (“Bohemian Rhapsody”) фильмидан ҳам ўзиб кетган.

Маълумот учун, фильмдаги бош ролни Майкл Жексоннинг жияни Жафар ижро этган. Кинотанқидчиларнинг билдиришича, фильм поп-афсона таржимаи ҳолидаги энг баҳсли эпизодларни қамраб олмаган, бунинг ўрнига ижодкорлар бор эътиборни концерт реконструкциялари ва мусиқий рақамларга қаратган.

Антуан Фукуанинг лентаси поп-мусиқа қироли бўлиш тақдири битилган Майкл Жексон ҳаётининг эрта даврларига бағишланган. Фильм Майклнинг ака-укалари ва талабчан ҳамда қаттиққўл отаси Жо (Колман Доминго) билан бўлган муносабати, “The Jackson 5” ёшлар жамоаси таркибидаги чиқишлари ҳамда яккахон карьерасининг бошланиши ҳақида сўзлайди.

Асар Жексоннинг мусиқа чўққисини қандай забт этгани, ўзининг асосий хит қўшиқларини яратгани ва “Billie Jean” таронасини ижро этиш вақтида илк бор “Ойда юриш” усулини қандай намойиш этганини кўрсатиб беради. Картинада шунингдек, Жулиано Вальди, Ниа Лонг, Майлз Теллер, Кейлин Даррел Жонс ва Лора Хэрриер суратга тушган.