Исроил Ғазодаги ёрдам нуқтасига зарба берди, 12 киши ҳалок бўлди

Исроил ҳарбийларининг қамал остидаги Ғазо секторининг марказий қисмидаги гуманитар ёрдам тарқатиш пунктига уюштирган ҳужуми оқибатида камида 12 фаластинлик ҳалок бўлди, 90 нафари яраланди. Бу ҳақда бугун, 2 август куни “Анадолу” хабар берди.

Ҳужумнинг мақсади яна оғир инқироз шароитида ёрдам олишга уринаётган тинч аҳоли бўлди. Ҳужум Нетзарим коридори яқинида, тинч аҳоли ёрдамни кутаётган ҳудудда содир бўлди. Маҳаллий манбаларга кўра, Исроил аскарлари оломонга қарата ўт очган ва ўнлаб одамлар ўқ остида қолган.

Қаттиқ қамал ва Исроилнинг доимий ўққа тутиши остида бўлган Ғазо сектори чуқур гуманитар фалокатни бошидан кечирмоқда. Анклав очарчилик ёқасида, сув, дори-дармон, тиббий асбоб-ускуналар ва гигиена воситаларининг кескин танқислиги бор.

Болалар, айниқса, оғир зарар кўрмоқда, кундалик ҳисоботлар очликдан ўлим кўпайишини кўрсатмоқда.

2023 йил 7 октябрдан бери маҳаллий ҳокимият маълумотларига кўра, Ғазода 162 киши очликдан вафот этган, улардан 92 нафари вояга етмаганлардир. Маҳаллий ва халқаро гуманитар ташкилотлар Исроилни очлик ва ташналикдан эксклавнинг тинч аҳолисига қарши “қурол” сифатида фойдаланганликда айбламоқда.