NASA муҳандиси бепул космик селфи хизматини ишга туширди

АҚШ Миллий аэронавтика ва космик тадқиқотлар бошқармасининг (NASA) собиқ муҳандиси Марк Робер космосдан селфи олиш имконини берувчи янги хизматни ишга туширди. Ушбу лойиҳа мутлақо бепул бўлиб, исталган фойдаланувчи ундан фойдаланиши мумкин. Бу ҳақда Робер асос солган компания сайтида маълумот берилди.

Космик селфилар “Sat Gus” номли сунъий йўлдош орқали ясалади. Ушбу йўлдош 2025 йил 14 январда Калифорниядаги Ванденберг космодромидан SpaceX компаниясининг Falcon 9 ракетаси ёрдамида орбитага чиқарилган. У тахминан 600 км баландликдаги қуйи орбитада Ер атрофида айланмоқда.

Йўлдош номидаги “Sat” сўзи satellite (сунъий йўлдош) атамасидан олинган, “Gus” эса Марк Робер асос солган CrunchLabs лабораторияси рамзига айланган олмахоннинг исми. Шу сабабли йўлдош айнан “Sat Gus” деб номланган.

Хизматнинг ишлаш принципи жуда содда: фойдаланувчи ўз суратини махсус сайтга юклайди, у сурат сунъий йўлдошдаги экран орқали намоён бўлади. Сўнгра сунъий йўлдош камераси ушбу экранни Ер фонида суратга олади. Робернинг сўзларига кўра, бу усул селфининг чинакам “космик” эканини тасдиқловчи ҳақиқий ва техник жиҳатдан аниқ ечимдир – расмда ҳам экран, ҳам Ер шарининг тасвири мавжуд бўлади.

Тасвирни Redwire Space компаниясига тегишли Argus камераси олади. Камера 3 мм ўлчамдаги объектив, нурланишдан ҳимояланган оптика ва 4000×3000 пиксел аниқликка эга. Ёруғлик муаммоларининг олдини олиш учун камера иккита кадр суратга олади: бири Ерни ёритишга мўлжалланган, иккинчиси эса экран учун. Сўнг бу икки расм HDR-форматда бирлаштирилади.

Хизматдан 13 ёшдан катта бўлган ҳар бир инсон фойдаланиши мумкин. Барча суратлар олдиндан модерациядан ўтади.

Қуйидагилар тақиқланади:

• бегона инсонларнинг фотосуратлари;
• машҳурлар суратлари;
• яланғоч, сиёсий, ҳақоратомуз ёки баҳсли контентлар;
• сунъий интеллект ёрдамида яратилган тасвирлар.

Фойдаланувчилар ўз селфилари, гуруҳ суратлари ёки ҳатто уй ҳайвонларининг расмларини ҳам юборишлари мумкин.

Лойиҳага юкланган биринчи суратлар ёз ўрталарида Ерга қайтади. Тайёр космик селфини фақат махсус ёпиқ ҳавола орқали кўриш мумкин бўлади ва у ҳавола қидирув тизимларида индексланмайди. Сунъий йўлдош ҳаракатини эса Satellite Tracker 3D каби онлайн хизматлар орқали реал вақт режимида кузатиш мумкин.