Украина собиқ президентининг ёрдамчиси отиб кетилди

Испаниянинг Мадрид шаҳрида украиналик сиёсатчи ва собиқ президент Виктор Януковичнинг ёрдамчиси Андрей Портнов отиб ўлдирилди. Бу ҳақда “El Pais” хабар берди.

Маълумотларга кўра, Портнов воқеа содир бўлган пайтда фарзандларини мактабга олиб бораётган эди. Манба хабарига кўра, номаълум қуролланган шахс (ёки бир неча киши) Портновни Мадриднинг Посуэло туманида жойлашган Америка мактаби олдида эрталаб отиб кетган. Полицияга ҳодиса ҳақида соат 9:15 да қўнғироқ бўлган. Эркакка бир неча марта ўқ узилган.

Ҳозирда Испания полицияси суиқасд ортида ким турганини аниқлаш бўйича терговни бошлаган.

“The Independent” нашрининг ёзишича, Андрей Портнов Украинадаги сиёсий режим алмашганидан сўнг, Европа Иттифоқи ва Канада томонидан санкциялар рўйхатига киритилган. У собиқ ҳокимият вакили сифатида Ғарб томонидан танқид остига олинган.

Маълумот учун, Портнов 1973 йилнинг 27 октябрида Луганск шаҳрида туғилган. Юридик маълумотга эга бўлиб, 2006 йилда Юлия Тимошенко блоки сафида халқ депутати этиб сайланган. У 2008 йилда фракция раҳбарининг ўринбосари, кейинроқ “Баткившина” партияси аъзоси бўлган ва ҳуқуқий бўлимни бошқарган.

2010 йилда президент маъмуриятида юқори лавозимни эгаллаган Портнов 2013 йилда Виктор Януковичнинг маслаҳатчиси, кейинчалик биринчи ўринбосарига айланган. 2014 йил февраль ойида ҳокимият ўзгаргач, у ишдан бўшатилган ва Украинадан қочиб кетган. Аввал Россияга, сўнгра Австрияга кўчган. 2019 йилда Украинага қайтган, бироқ Россия билан уруш бошланганидан кейин яна чет элга чиққан эди.