Тожикистондан 26,8 кг наркотик модда олиб келганлар ушланди

Тожикистондан жами 26 килограмм 805 грамм гиёҳвандлик воситаларини контрабанда йўли билан Ўзбекистонга олиб келган 6 киши қўлга олинди. Бу ҳақда Давлат хавфсизлик хизмати хабар берди.

Қайд этилишича, олиб борилган тезкор тадбирда 1986 йилда туғилган Тожикистон фуқароси давлат чегарасини қонунга хилоф равишда бузиб ўтган вақтида тўхтатиб қолинган. Унга тегишли сумка кўздан кечирилганда, 15 дона ўрамдаги жами 14 килограмм 584 грамм “гашиш” моддаси борлиги аниқланиб, процессуал тартибда расмийлаштириб олинган. Шундан сўнг, уни буюртма қилган шахсни аниқлаш юзасидан тезкор тадбир давом эттирилди. Натижада, Фарғона вилоятининг Тошлоқ туманида яшовчи, 1969 йилда туғилган Бекобод туманида наркотик моддани қабул қилиб олган вақтида ашёвий далиллар билан ушланди.

Бошқа ҳолатда эса Фарғона вилоятида ўтказилган тезкор тадбирда Тошкент вилоятининг Бекобод туманида яшовчи, 1992 йилда туғилган шахс қўшни давлатдан контрабанда йўли билан олиб келинган 9 килограмм 467 грамм “опий” моддасини сотган вақтида ашёвий далиллар билан қўлга олинди. Терговга қадар текширув давомида тожикистонлик наркокуръер томонидан Сурхондарё вилояти ҳудудига контрабанда йўли билан етказиб берилган мазкур гиёҳвандлик моддасини Денов туманида яшовчи, 1994 йилда туғилган фуқаро қабул қилиб олиб, Тошкент вилоятига олиб келгани аниқланган ва у ҳам процессуал тартибда ушланган.

Қўқон шаҳрида қайд этилган ҳолатда, “Фарғона-Қўқон” йўналишида ҳаракатланаётган Lacetti русумли автомашина тўхтатилиб, холислар иштирокида кўздан кечирилди. Натижада унда йўловчи сифатида ҳаракатланаётган Қўқон шаҳрида яшовчи, 1967 йилда туғилган фуқаро ўзининг бел қисмига 1 килограмм 759 грамм “гашиш” моддасини яшириб олгани аниқланди.

Фарғона шаҳрида кузатилган ҳолатда эса, “Фарғона-Тошлоқ” йўналиши бўйлаб ҳаракатланаётган, 1995 йилда туғилган шахс бошқарувидаги “Запарожец” русумли автомашина тўхтатилиб, холислар иштирокида кўздан кечирилганда, унинг салон қисмида 995 грамм “гашиш” моддаси борлиги аниқланди ва тегишли тартибда расмийлаштириб олинди.

Ҳозирда ушбу шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.